Дар Душанбе ҷаласаи навбатии Шӯрои ҳамкории фарҳангии кишварҳои узви Иттиҳоди Давлатҳои Мустақил оғоз гардид

Сентябрь 18, 2019 13:04

ДУШАНБЕ, 18.09.2019 /АМИТ «Ховар»/. Шӯрои ҳамкории фарҳангии кишварҳои  узви Иттиҳоди Давлатҳои Мустақил  дар ҷаласаи XXХIV-и худ, ки имрӯз дар  толори Китобхонаи миллии Тоҷикистон ба кори худ оғоз бахшид, шаҳри Душанберо пойтахти фарҳангии ИДМ дар соли  2021  эълон кард.   

Бояд тазаккур дод, ки мақоми «пойтахти фарҳангии ИДМ» ба ин ё он шаҳр бо қарори Шӯрои сарони давлатҳои ИДМ дода мешавад. Чунин мақом ба пойтахти Тоҷикистон тибқи қарори Шӯрои сарони давлатҳои ИДМ моҳи сентябри соли 2018 дода шудааст.  Мутобиқи ин қарор ба ҳукуматҳои кишварҳои узви ИДМ супориш дода шудааст, ки барои иштироки ҳайатҳои худ дар тадбирҳои вобаста ба татбиқи Барномаи байнидавлатии «Пойтахтҳои фарҳангии ИДМ» дар кишварҳои ҳамдигар мусоидат намоянд.

Тавре мухбири АМИТ «Ховар» иттилоъ медиҳад, дар  кори  ҷаласа вазирони фарҳанг, муовинони аввал ва муовинони вазирони фарҳанги Тоҷикистон, Ӯзбекистон Қазоқистон, Қирғизистон, Туркманистон, Озарбойҷон, Арманистон, Беларус, Россия ва намояндагони  ташкилотҳои байналмилалӣ иштирок намуданд.

Ҷаласаро Вазири фарҳанги Ҷумҳурии Тоҷикистон, узви Шӯрои ҳамкории фарҳангии кишварҳои узви ИДМ Шамсиддин Орумбекзода оғоз намуда, иброз дошт, ки Шӯрои фарҳангии кишварҳои муштаракулманофеъ як  ниҳоди  хеле муътабар аст, ки дар густариши ҳамкории байни мамлакатҳо нақши бузург мебозад.

«Муносибатҳои фарҳангӣ яке аз бузургтарин шакли робитаҳои байни миллатҳо буда, дар бисёр мавридҳо мушкилоти мавҷударо бо ҳамкории фарҳангӣ  баррасӣ мекунанд»,- иброз дошт мавсуф.

Вазири фарҳани Ҷумҳурии Беларус Юрий Бондар оид ба ҳамкории ИДМ дар солҳои 2021-2025 ибрози назар намуда, робитаҳои минбаъдаро дар ин соҳа судманд арзёбӣ намуд.

Бояд гуфт, ки ҷаласаҳои солонаи Шӯрои ҳамкории фарҳангии кишварҳои аъзои Иттиҳоди Давлатҳои Мустақил ҳамасола дар давлатҳои гуногун доир шуда, бори дуюм аст, ки дар Ҷумҳурии Тоҷикистон баргузор мешавад.

Дар ҷаласаи Шӯро бештар аз 16 масъала баррасӣ ва нисбат ба баъзе аз мушкилоти ҷойдошта фикру андешаҳои ҷолиб пешниҳод гардиданд.

Ҳамчунин масъалаи омодасозии мутахассисони соҳаи фарҳанг ва баланд бардоштани сатҳи касбияти онҳо дар мадди назари иштирокчиёни ҷаласа қарор дошт.

Иштирокдорони ҷаласа доир ба  натиҷаҳои Соли фарҳанг дар ИДМ,  иштироки мамлакатҳо ва саҳми онҳо дар тарғиби хондани китобу китобдорӣ андешаҳояшонро баён доштанд.

Зикр гардид, ки китоб ва ҳунару санъат сарҳад надошта, китоб дар  фаъолияти миллатҳои тамаддунсозу фарҳангпарвар дар радифи муқаддасоту неъматҳои миллӣ ҷой дорад.

Дар кори ҷаласа ба  соҳаи театр  низ таваҷҷуҳи хосса зоҳир карда шуд. Қарор карда шуд, ки Театри давлатии академии опера ва балети ба номи С. Айнӣ моҳи октябри соли равон бо барномаи фарҳангӣ ба шаҳри Самарқанд сафар намояд.

Вазорати фарҳанги Ҷумҳурии Тоҷикистон  муваззаф гардид, ки дар  Шӯрои баъдина, ки соли 2020 баргузор мегардад, оид ба омадагӣ ба эълон гардидани Душанбе ҳамчун  пойтахти фарҳангии ИДМ дар соли 2021 маълумот манзур намояд.

Ёдовар мешавем, ки ҷаласаи мазкур ду рӯз идома ёфта, ҳайати меҳмонон аз   маконҳои таърихиву фарҳангӣ ва сайёҳии шаҳрҳои Ҳисор ва Турсунзода боздид менамоянд.

 

Сентябрь 18, 2019 13:04

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад
МАЗМУНҲОИ НАВРӮЗӢ ДАР АШЪОРИ АҲДИ КЛАССИКИИ ФОРСУ ТОҶИК. Андешаҳои адабиётшинос дар хусус
НАВРӮЗ ДАР ЗАРАФШОН. Он бо «тухмҷангак»-и кӯдакон оғоз мегардад