Дар Санкт-Петербург Клуби дӯстони Тоҷикистон таъсис дода шуд

Сентябрь 8, 2019 08:44

ДУШАНБЕ, 08.09.2019. /АМИТ «Ховар»/. Дар арафаи Рӯзи Истиқлолияти давлатии Ҷумҳурии Тоҷикистон дар шаҳри Санкт-Петербурги Федератсияи Россия Клуби дӯстони Тоҷикистон таъсис дода шуд. Дар ҷамъомаде, ки дар Консулгарии генералии Ҷумҳурии Тоҷикистон баргузор гардид, намояндагони сохторҳои давлатӣ, аҳли илму фарҳанг ва ширкатҳои тиҷоратӣ ҷамъ омада, дар бораи таъсис додани клуб ва боз ҳам устувор кардани дӯстию ҳамкории байни Тоҷикистону Россия сухан гуфтанд. Дар ин бора ба АМИТ «Ховар»  аз Консулгарии генералии Ҷумҳурии Тоҷикистон дар шаҳри Санкт-Пербург хабар доданд.

Зимни суханронии худ Консули генералии Ҷумҳурии Тоҷикистон Давлаталӣ Назризода аз таърихи муносибатҳои Тоҷикистон бо Россия, сафарҳои нависанда ва мутафаккири тоҷик Аҳмади Дониш ба Санкт-Петербург, саҳми олимони рус дар омӯзиши табиату набототи мамлакати мо, таъриху фарҳанги халқи тоҷик, саҳми халқи рус дар рушди Тоҷикистон ёдовар шуд. Ӯ зикр кард, ки дар шароити истиқлолият муносибатҳои Тоҷикистону Россия дар рӯҳияи иттифоқчӣ ва шарикии стратегӣ будан ривоҷ доранд. Дипломати тоҷик зикр кард, ки ҳамкории минтақавии Тоҷикистон бо субъектҳои Федератсияи Россия дар Минтақаи федералии шимолу ғарбӣ, хусусан Санкт-Петербург, ки бо Душанбе бародаршаҳр мебошад, ба таваҷҷуҳи бештар ниёз доранд, ки дар ин ҷода Клуби дӯстони Тоҷикистон метавонад фаъолияти назаррас дошта бошад.

Ректори Донишкадаи Смолний, доктори илмҳои таърих Виктор Прокопевич Казантсев аз солҳои фаъолияташ дар Тоҷикистон ба некӣ ёдовар шуда, рушди ҳамкориро дар соҳаи маориф, алалхусус омода кардани олимони ҷавон муҳим арзёбӣ намуд. Ӯ зикр кард, ки омода аст ҷиҳати тайёр кардани олимони ҷавони соҳаи таърих ва дастрасӣ ёфтани онҳо ба бойгониҳои Россия кумаки худро расонад.

Вероника Евгеневна Нуждина, директори ширкати “Спансет” дар бораи сафараш ба Тоҷикистон ёдовар шуда, дар бораи табиат, шароити сайёҳӣ, имкониятҳои рушди муносибатҳои иқтисодӣ ва тиҷоратӣ тавассути тавсеаи робитаҳои тиҷоратии Клуби дӯстони Тоҷикистон ҳарф зад ва иброз дошт, ки ин, бешубҳа, ба муаррифии беҳтари Тоҷикистон дар пойтахти фарҳангии Россия таъсири худро гузошта метавонад.

Директори генералии ширкати “STI Inernational” Олга Владимировна Ходаковская, ки ҳамзамон раиси ТОП-50 соҳибкори муваффақи Санкт-Петербург мебошад, хабар дод, ки дар доираи Бизнес-форуми моҳи октябр доиршаванда омода аст ҳамкасбони тоҷикистонии худро бо мақсади роҳандозии робитаҳои мустақим ва нақшаҳои минбаъда роҷеъ ба ҳамкорӣ ба Санкт-Петербург даъват намояд.

Виктория Александровна Хаглеева —  сардори Раёсати Нозироти меҳнати Санкт-Петербург зикр намуд, ки ифтитоҳи Клуб чун намунаи хуби шиносоӣ бо одамҳои нав ва муошират бо дӯстон хизмат карда метавонад.

Иштирокчиёни дигар низ аз ҷумлаи кормандони сохторҳои тиҷоратӣ, бонкӣ, ҳуқуқшиносон ва соҳибкорони инфиродӣ зимни суханронҳои худ ин иқдомро ҳамчун як марҳилаи нав ва намунавии барпо намудани ҳамкорӣ ҳамаҷониба қабул намуданд. Аъзои Клуб бо мақсади тақвият бахшидан ба муносибатҳои тиҷоратӣ миёни соҳибкорони Тоҷикистону кишварҳои хориҷӣ пешниҳод намуданд то ҷуғрофияи Клуб аз ҳисоби шарикони хориҷияшон аз давлати Беларус, Литва, Латвия, Эстония ва Финляндия васеъ карда шавад. Ғайр аз ин ҳозирин изҳори омодагӣ намуданд, ки ба моҳи октябри соли равон дар доираи бизнес-форуми шаҳри Санкт-Петербург соҳибкорони тоҷикистониро даъват намоянд.

Интизор аст, ки бо оғози фаъолияти Клуб ва мустаҳкам намудани сохтори он таваҷҷуҳи Клуб ба ҳамкорӣ бо сохторҳои гуногуни Ҷумҳурии Тоҷикистон равона гардида, рӯзҳои наздик дар доираи он дар шаҳри  Санкт-Петербург шомҳои эҷодӣ, ҳунарӣ ва намоиши расмҳои рассоми тоҷик Матлуба Яҳёева барпо мегарданд.

Вероника Нуждина якдилона роҳбари Клуби дӯстони Тоҷикистон интихоб гардид.

Сентябрь 8, 2019 08:44

Хабарҳои дигари ин бахш

Шараф Шерализода бо муовини котиби давлатии Котиботи давлатии Швейтсария оид ба молияи байналмилалӣ мулоқот намуд
Намояндаи Тоҷикистон дар чорабинӣ оид ба маблағгузории миллӣ барои расидан ба Ҳадафҳои Рушди Устувор иштирок намуд
Ҷонибек Ҳикмат дар чорабинӣ бахшида ба Рӯзи байналмилалии «ҷаҳони бе партов» иштирок намуд
Дар қароргоҳи Созмони Милали Муттаҳид бахшида ба таҷлили ҷашни Наврӯзи байналмилалӣ ҳамоиши тантанавӣ доир гашт
Деннис Фрэнсис саҳми Тоҷикистонро дар пешбарии масъалаҳои марбут ба об баланд арзёбӣ намуд
Дар Ню-Йорк аҳаммияти фаъолияти Раванди оби Душанбе баррасӣ гардид
Дар шаҳри Остона ҷашни байналмилалии Наврӯз таҷлил гардид
Вазири корҳои хориҷии Тоҷикистон дар Конфронс ба муносибати Рӯзи ҷаҳонии об иштирок намуд
Тоҷикистон ва Туркия муносибатҳои дуҷонибаро дар самтҳои сиёсӣ, иқтисодӣ ва сармоягузорӣ баррасӣ намуданд
Дар шаҳри Москва Наврӯзи байналмилалиро таҷлил намуданд
Ҷашни байналмилалии Наврӯзро дар Ашқобод бошукуҳ таҷлил намуданд
Дар Берлин ҷашни байналмилалии Наврӯзро таҷлил намуданд