Дар Хуҷанд Мусобиқаи 7-уми байналмилалӣ оид ба дзюдо барои дарёфти Ҷоми Президенти Тоҷикистон оғоз гардид

Октябрь 3, 2019 08:50

СУҒД, 03.10.2019. /АМИТ «Ховар»/.  2 октябр дар Қасри варзиши шаҳри Хуҷанд​ маросими кушодашавии​ Мусобиқаи 7-уми байналмилалӣ оид ба дзюдо барои дарёфти Ҷоми Президенти Ҷумҳурии​ Тоҷикистон баргузор гардид. Дар ин бора аз Хадамоти матбуоти Раиси вилояти Суғд  ба шореҳи варзиши АМИТ «Ховар» Меҳрони Қурбон хабар  доданд.

Тибқи иттилои манбаъ,   дар маросими кушодашавии мусобиқаи бонуфузи байналмилалӣ Раиси вилояти Суғд Раҷаббой Аҳмадзода, муовини Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Дилшод Назаров, Раиси Федератсияи дзюдои Тоҷикистон Нурулло Лоиқов, ноиби Президенти Федератсияи байналмилалии дзюдо Виктор Флореску ва дигар меҳмонони олиқадр иштирок доштанд.

Раиси вилоят Раҷаббой Аҳмадзода меҳмонон ва иштирокчиёни Мусобиқаи байналмилалӣ  оид ба гўштини дзюдо барои дарёфти​ Ҷоми Президенти​ Ҷумҳурии Тоҷикистонро ба сарзамини меҳмоннавози Суғд хайрамақдам гуфта, таъкид кард, ки дар даврони Истиқлолияти давлатии Ҷумҳурии Тоҷикистон маҳз бо ташаббус ва ғамхориҳои Асосгузори сулҳу ваҳдати миллӣ – Пешвои​ миллат, Президенти​ Ҷумҳурии Тоҷикистон муҳтарам Эмомалӣ Раҳмон ба рушди соҳаи варзиш аҳамияти хосса дода шуда, дар ин самт як қатор иқдомҳо роҳандозӣ гардиданд. Мавриди истифода қарор додани иншооти гуногуни варзишӣ, аз ҷумла толор ва қасрҳои варзишӣ, майдончаҳои варзишӣ ва ҳавзҳои шиноварӣ, рўзи шанбе эълон шудани «Рўзи варзиш», ташкили мусобиқаҳои оммавии варзишӣ ва дигар чорабиниҳое, ки ба ин самт нигаронида шудаанд, гувоҳи гуфтаҳои боло мебошанд.

Натиҷаи чунин дастгириҳост, ки соҳаи варзиш дар мамлакат рушд намуда, варзишгарони мо дар мусобиқаҳои байналмилалӣ ба дастовардҳои назаррас ноил мешаванд. Аз ҷумла танҳо давоми нуҳ моҳи соли равон варзишгарони вилоят дар мусобиқаҳои байналмилалӣ иштирок намуда, ба гирифтани 98 медали тилло, 57 медали биринҷӣ ва 115 медали нуқра ноил гардиданд.​

Мусобиқаи байналмилалӣ барои дарёфти Ҷоми Президенти Ҷумҳурии Тоҷикистон соли ҳафтум аст, ки дар сатҳи баланд баргузор мегардад ва он бори аввал дар вилояти Суғд доир шуда истодааст. Дар мусобиқаи мазкур зиёда аз 200 нафар варзишгарони кишварҳои минтақа иштирок доранд. Мусобиқаи байналмилалӣ аз рӯи ҳафт категорияи вазнӣ миёни мардон: -60кг, -66кг, -73кг, -81кг, -90кг, -100кг, +100кг гузаронида шуда, то 5 октябр идома меёбад.

Октябрь 3, 2019 08:50

Хабарҳои дигари ин бахш

Дарвозабон Рустам Ятимов беҳтарин бозингари вохӯрии дастаҳои «Истиқлол» ва «Шарҷа» дониста шуд
ЛИГАИ ЧЕМПИОНҲОИ КФО. «Истиқлол» дар бозии охирин бар дастаи «Шарҷа» ғолиб омад
Sputnik: Путин ба варзишгарони Тоҷикистон баҳои баланд дод
ФУТБОЛ. Замони баргузории бозиҳои даври панҷуми Чемпионати Тоҷикистон дар Лигаи олӣ муайян шуд
Носир Бозор сармураббии дастаи мунтахаби дзюдои бонувони Тоҷикистон интихоб гардид
ТАРТИБИ ИНТИХОБИ МУСОБИҚОТИ «ПАРИЖ-2024» ТАСДИҚ ШУД. 17 варзишгари Тоҷикистон аз кумакҳои молии олимпӣ бархӯрдор мешаванд
«DUSHANBE CUP». Ғолибони Мусобиқаи байналмилалии теннис миёни наврасон муайян гардиданд
Дастаи мунтахаби Тоҷикистон оид ба таэквондо WT ба мусобиқаҳои байналмилалӣ омодагӣ мебинад
ЛИГАИ ЧЕМПИОНҲОИ КФО. Пагоҳ «Истиқлол» бозии охирини худро бо дастаи «Шарҷа» доир мекунад
ФУТБОЛ. «Хатлон» ва «Регар-ТадАЗ» дар чемпионат миёни дастаҳои Лигаи олӣ ғолиб омаданд
ПАРИЖ-2024: марҳилаи интихобии олимпӣ дар намуди ҷудо аз 24 июни соли 2022 шурӯъ мегардад
Дар Душанбе Мусобиқаи байналмилалӣ оид ба теннис ҷараён дорад