Дар ноҳияи Балҷувони Мусобиқаи ҷумҳуриявӣ оид ба гӯштин баргузор мегардад

ДУШАНБЕ, 21.10.2019 /АМИТ «Ховар»/. 2-3 ноябр дар ноҳияи Балҷувони вилояти Хатлон Мусобиқаи ҷумҳуриявӣ оид ба гӯштини самбо байни наврасони солҳои таваллудашон 2002 – 2004 баргузор мегардад. Дар ин бора ба АМИТ «Ховар» аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Даври маҳаллии мусобиқаи мазкур 14 сентябр дар тамоми шаҳру ноҳияҳои ҷумҳурӣ доир  шуда, даври минтақавӣ ва вилоятии он 6 октябр бо доираи васеи варзишгарон баргузор гардид.

Ба иттилои манбаъ, мусобиқаи мазкурро Собирҷон Сулаймонов сардоварӣ намуда, дар он варзишгарон аз дастаҳои Хатлон 1, Хатлон 2, Душанбе 1, Душанбе 2, вилояти Мухтори Кӯҳистони Бадахшон, Суғд ва шаҳру ноҳияҳои тобеи марказ иштирок менамоянд.

Дар даври ниҳоӣ варзишгарони навраси мамлакат барои мақомҳои ифтихорӣ миёни ҳам рақобат менамоянд. Дар ин давр иштироки 64 нафар варзишгар дар назар дошта шудааст. Дар охир  ғолибони мусобиқа имкони иштирок дар мусобиқаву чемпионатҳои байналмилалиро пайдо мекунанд.