Фаъолияти 10-солаи Ҷумҳурии Тоҷикистон дар самти пурзӯр намудани низоми миллии муқовимат ба қонунигардонии даромадҳои бо роҳи ҷиноят бадастоварда

Октябрь 29, 2019 16:40

ДУШАНБЕ, 29.10.2019/АМИТ «Ховар»/. Дар Бонки миллии Тоҷикистон бахшида ба 10-солагии таъсиси Департаменти мониторинги молиявии назди Бонки миллии Тоҷикистон /БМТ/ дар мавзӯи «Дастовардҳои Ҷумҳурии Тоҷикистон дар самти пурзӯр намудани низоми миллии муқовимат ба қонунигардонии даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли /МҚД/МТ/МПСҚО/» ҳамоиш баргузор гардид.

Раиси БМТ Ҷамшед Нурмаҳмадзода зикр кард, ки дар ҷаҳони муосир муқовимат ба қонунигардонии даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли  ом  яке аз масъалаҳои муҳим ба ҳисоб рафта, давлатҳои ҷаҳон ва созмонҳои байналмилалӣ ҷиҳати мубориза алайҳи ин амали номатлуб тамоми тадбирҳои зарурӣ андешида истодаанд.  Дар ин радиф, бо мақсади мустаҳкам намудани ҳамкории байналмилалӣ дар самти мазкур аз тарафи кишварҳои бонуфузи ҷаҳон соли 1989 Гурӯҳи татбиқи чораҳои молиявии муқовимат ба қонунигардонии даромадҳо  — машҳур бо номи ФАТФ таъсис дода шуд ва дар робита бо он тавсияҳои дахлдори ФАТФ таҳия ва қабул гардида, иҷрои онҳо тавассути мутобиқ намудани низоми миллии худ ба тавсияҳои зикршуда аз ҷониби аъзои давлатҳои СММ пазируфта шуд.

Ҷумҳурии Тоҷикистон низ дар қатори дигар кишварҳои ҷаҳон ба мутобиқ намудани низоми миллии  муқовимат ба қонунигардонии даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом ба Тавсияҳои ФАТФ, тақвияти фаъолияти ҷумҳурӣ дар арсаи байналмилалӣ ва боло бурдани нуфузу эътибори мамлакат чораҳои зарурӣ амалӣ намуда, аз соли 2004 ҳамчун давлати аъзо ба яке аз гурӯҳҳои минтақавӣ, ба монанди ФАТФ — Гурӯҳи Авруосиё шомил мебошад. Бинобар ин, соли 2008 аз ҷониби коршиносони Бонки ҷаҳонӣ баҳодиҳии тарафайни Ҷумҳурии Тоҷикистон ҷиҳати мутобиқат ба Тавсияҳои ФАТФ гузаронида шуда, тибқи натиҷаҳои он таъсис додани мақомоти кашшофии молиявӣ дар ҷумҳурӣ мувофиқи мақсад арзёбӣ гардид.

Ҷиҳати иҷрои талаботи тавсияҳои ФАТФ, дар асоси Фармони Президенти Ҷумҳурии Тоҷикистон  аз 20 октябри соли 2009, дар назди БМТ Департаменти мониторинги молиявӣ таъсис дода шуда, инчунин тибқи Фармони Президенти Ҷумҳурии Тоҷикистон аз 12 декабри соли 2017, Бонки миллии Тоҷикистон (Департаменти мониторинги молиявӣ) мақоми ваколатдор дар самти муқовимат ба қонунигардонии даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом муайян гардид, — изҳор намуд Раиси Комиссияи доимоамалкунандаи байниидоравӣ оид МҚД/МТ ва МПСҚО, Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ Зариф Ализода. Ба гуфтаи ӯ, солҳои охир Ҷумҳурии Тоҷикистон барои тақвияти низоми миллии муқовимат ба қонунигардонии даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом кӯшиши зиёд ба харҷ додааст, ки аз иродаи қавии сиёсати пешгирифтаи роҳбарияти Ҳукумати ҷумҳурӣ дар татбиқи Тавсияҳои ФАТФ шаҳодат медиҳад.

Дар тӯли фаъолияти хеш дар доираи салоҳият ва вазифаҳои худ дар ҳамкорӣ бо мақомоти давлатӣ ва бахши хусусии Ҷумҳурии Тоҷикистон ҷиҳати амалӣ намудани як қатор чорабиниҳо, ки ба таъмини амнияти иқтисодии давлат, инчунин рушди низоми миллии кишвар дар ин самт равона гардидаанд, нақши муҳим бозидааст, зикр кард Раиси БМТ.

Директори Департаменти мониторинги молиявӣ Фарҳод Билолов оид ба  фаъолияти ҷории департамент дар самти  МҚД/МТ/МПСҚО рӯнамоии худро манзури аҳли нишаст гардонида, зикр кард, ки маҳз бо саъю кӯшиши мақомоти дахлдор Ҷумҳурии Тоҷикистон дар ин самт ба дастовардҳои назаррас ноил гардид. Иштирокдорони ҳамоиш таъкид карданд, ки дар ҳамбастагӣ бо мақомоти дахлдори мамлакат метавонанд ҳолатҳои марбут ба қонунигардонии даромадҳо ва маблағгузории терроризмро ошкор намуда, барои рушди минбаъдаи низоми миллии муқовимат ба қонунигардонии даромадҳои бо роҳи ҷиноят бадастоварда, маблағгузории терроризм ва паҳнкунии силоҳи қатли ом такони ҷиддӣ бахшида, нуфузи Ҷумҳурии Тоҷикистонро дар самти муқовимат ба падидаҳои терроризм дар арсаи ҷаҳонӣ боло баранд.

Октябрь 29, 2019 16:40

Хабарҳои дигари ин бахш

Масъалаи таъсиси Фонди байналмилалии ҳифзи пиряхҳо дар Тоҷикистон мавриди баррасӣ қарор гирифт
Дар Тошканд электробус ва электротроллейбуси «Акиа Авесто»-и Тоҷикистон таваҷҷуҳи ширкатҳои хориҷиро ба худ ҷалб намуданд
Намояндагони ширкатҳои сайёҳии Узбекистон аз маконҳои сайёҳии вилояти Суғд дидан менамоянд
ПАНҶСОЛАИ РУШДИ САНОАТ. Дар шаҳри Гулистон як зумра корхонаҳои саноатӣ бунёд мегарданд
Дар Тоҷикистон баҳри нест кардани малах корҳои кимиёвӣ ҷараён доранд
Ҷаласаи XVIII гурӯҳи корӣ оид ба таҳияи стандартҳои назорати давлатии молиявии мақомоти олии аудити давлатҳои аъзои ИДМ баргузор шуд
Тоҷиддин Ҷӯразода ва Абдулло Шаҳид дар Ню-Йорк вазъ ва дурнамои рушди сайёҳии Тоҷикистонро баррасӣ намуданд
Дар Тоҷикистон беш аз 70 намуд хизматрасониҳои давлатӣ дар соҳаи андоз дар шакли электронӣ ба роҳ монда шудаанд
Дар Душанбе масъалаи тақвият бахшидани ҳамкорӣ миёни Тоҷикистон ва Чин мавриди баррасӣ қарор гирифт
Дар ҷаласаи ситоди вилоятии Хатлон масъалаи содироти маҳсулоти кишоварзӣ баррасӣ шуд
МАСЛИҲАТИ МУТАХАССИС. Ҷомеаи ҷаҳон бояд ба оқибатҳои тағйирёбии иқлим мутобиқ гардонида шавад
Дар семоҳаи аввали соли 2022 аз ҳисоби андозҳо ва дигар пардохтҳои ҳатмӣ ба буҷети давлатӣ беш аз 3,5 млрд сомонӣ ворид карда шуд