Дар мавзуи «Иттиҳоди Давлатҳои Мустақил: самтҳо ва дурнамои рушд» конференсияи байналмилалии илмӣ-амалӣ баргузор шуд

ДУШАНБЕ, 27.10.2026 /АМИТ «Ховар»/. Имрӯз дар Академияи миллии илмҳои Тоҷикистон таҳти унвони «Иттиҳоди Давлатҳои Мустақил: самтҳо ва дурнамои рушд» конференсияи байналмилалии илмӣ-амалӣ баргузор гардид, хабар доданд ба АМИТ «Ховар» аз ин академия.

Конференсия бо ташаббуси бахши таҳқиқи Русия дар назди шуъбаи Иттиҳоди Давлатҳои Мустақил ва Институти омӯзиши масъалаҳои давлатҳои Осиё ва Аврупои Академияи миллии илмҳои Тоҷикистон баргузор шуда, дар кори он намояндагони мақомоти давлатӣ, намояндагиҳои дипломатӣ, муассисаҳои илмӣ-таҳқиқотӣ ва ҷомеаи коршиносии Тоҷикистон ва Русия иштирок намуданд.

Президенти Академияи миллии илмҳои Тоҷикистон Қобилҷон Хушвахтзода иброз дошт, ки Иттиҳоди Давлатҳои Мустақил дар тӯли фаъолияташ ба яке аз майдонҳои муҳими муколамаи сиёсӣ, ҳамкории иқтисодӣ, илмию техникӣ, фарҳангӣ ва гуманитарӣ байни кишварҳои аъзо табдил ёфтааст. Тоҷикистон ҳамчун яке аз давлатҳои муассиси Иттиҳоди Давлатҳои Мустақил ба рушди муносибатҳои дӯстона, таҳкими эътимоди мутақобила ва густариши ҳамкории судманд бо кишварҳои аъзо таваҷҷуҳи хосса зоҳир менамояд.

Таъкид гардид, ки  бо шарофати сиёсати хориҷии сулҳҷӯёна ва созандаи Президенти Тоҷикистон муҳтарам Эмомалӣ Раҳмон ҷумҳурии мо дар таҳкими ҳамгироии минтақавӣ, таъмини амнияту субот ва рушди муносибатҳои гуногунҷанба дар фазои Иттиҳоди Давлатҳои Мустақил саҳми назаррас мегузорад.

Дар идома Сафири Фавқулода ва Мухтори Федератсияи Русия дар Ҷумҳурии Тоҷикистон Семён Григорев доир ба аҳамияти таҳкими муносибатҳои дӯстона ва шарикии стратегӣ байни кишварҳои узви Иттиҳоди Давлатҳои Мустақил андешаронӣ намуда, нақши ин созмонро дар рушди ҳамкории бисёрҷониба, таъмини суботи минтақавӣ ва густариши робитаҳои иқтисодию гуманитарӣ муҳим арзёбӣ намуд.

Гуфта шуд, ки баргузории чунин ҳамоишҳои байналмилалӣ барои таҳкими муколамаи илмӣ, баррасии масъалаҳои мубрами рушди кишварҳои Иттиҳоди Давлатҳои Мустақил ва муайян намудани дурнамои ҳамкории минбаъда заминаи мусоид фароҳам меорад.

Дар конференсия инчунин директори Институти омӯзиши масъалаҳои давлатҳои Осиё ва Аврупои академияи Рустам Ҳайдарзода, вакили Маҷлиси намояндагони Маҷлиси Олии Ҷумҳурии Тоҷикистон Дилафрӯз Саидӣ ва дигар олимону муҳаққиқон сухан намуданд.

Иброз гардид, ки дар шароити мураккаби муносибатҳои байналмилалӣ ва тағйирёбии босуръати равандҳои геополитикӣ тақвияти ҳамкории бисёрҷониба, таҳкими эътимоди мутақобила, ҳамоҳангсозии иқдомҳои муштарак ва истифодаи самараноки имкониятҳои мавҷуда барои рушди устувори давлатҳои аъзо аҳамияти махсус касб менамояд.

Густариши ҳамкорӣ дар соҳаҳои иқтисоду тиҷорат, саноат, энергетика, нақлиёт, маориф, илм ва технологияҳои муосир, инчунин рушди робитаҳои гуманитарӣ аз самтҳои афзалиятноки фаъолияти минбаъдаи Иттиҳоди Давлатҳои Мустақил ба ҳисоб меравад. Дар ин замина нақши муассисаҳои илмию таҳқиқотӣ дар омӯзиши равандҳои ҳамгироӣ, таҳияи пешниҳодҳои илман асоснок ва муайян намудани роҳҳои самараноки ҳалли масъалаҳои муштараки давлатҳои аъзо муҳим арзёбӣ гардид.

АКС: Академияи миллии илмҳои Тоҷикистон