Футзалистони дастаи мунтахаби Тоҷикистон ба дарвозаи дастаи мунтахаби Непал 6 голи беҷавоб заданд

ДУШАНБЕ, 24.10.2019. /АМИТ «Ховар»/. Дастаи мунтахаби миллии футзали Тоҷикистон дар бозиҳои интихобии Чемпионати Осиё-2020, ки дар шаҳри Урмияи Эрон оғоз гардид, бар дастаи мунтахаби футзали Непал ғолиб омад. Шогирдони Деян Дедович ба дарвозаи непалиҳо 6 голи беҷавоб заданд. Дар ин бора шореҳи варзиши АМИТ «Ховар» Меҳрони Қурбон бо истинод ба Федератсияи  футболи Тоҷикистон иттилоъ  медиҳад.  

Тибқи иттилои манбаъ, дар ин рақобати ҷолиб голҳои  дастаи мунтахаби Тоҷикистонро  Рустам Ҳамидов, Файзалӣ Сардоров, Парвиз Раҳматов ва Умед Қӯзиев   ба нишон  расониданд.

Рақобати навбатии дастаи мунтахаби  футзали Тоҷикистон бо дастаи мунтахаби  футзали Афғонистон имрӯз, 24 октябр, соати 14:30 бо вақти Тоҷикистон баргузор мегардад. Ду дастаи беҳтарини гурӯҳ ба марҳилаи ниҳоии чемпионати Осиё-2020, ки соли оянда дар Туркманистон сурат мегирад, роҳ меёбанд.

Хотиррасон  мешавем, ки  дар мусобиқоти интихобии Чемпионати Осиё – 2020 оид ба футзал дастаи  мунтахаби Тоҷикистон дар минтақаи иттиҳоди Марказ ва Ҷануб иштирок мекунад. Дар гурӯҳи «А» футзалбозони  шинохта бозиҳои  худро бо дастаҳои мунтахаби  Непал 23 октябр, Афғонистон 24 октябр ва Ӯзбекистон 25 октябр доир менамоянд. Марҳилаи интихобии Чемпионати Осиё – 2020 дар шаҳри Урмияи Эрон баргузор мегардад.

Ҳайати пурраи  дастаи  мунтахаби Тоҷикистон оид ба футзал:

Дарвозабонҳо: Фируз Бекмуродов, Муродулло Алиқулов (аз – «Соро компания»), Баҳромхоҷа Сидиқхоҷаев («Сипар»);

Бозингарони майдон: Дилшод Саломов («Сипар»), Шавкат Ҳалимов, Парвиз Раҳматов, Иқбол Воситзода, Баҳодур Хоҷаев (аз – «Сипар»), Раҳмоналӣ Шарипов, Муҳаммадҷон Шарипов, Файзалӣ Сардоров, Умед Кузиев, Собирҷон Гуляков, Идрис Ёров (аз – «Соро компания»), Қувватбек Равшанбеков («Памир»), Самандар Ризомов («Карон»), Рустам Ҳамидов («Сан Сити», Қирғизистон).