Кумитаи миллии олимпии Тоҷикистон ба Сомон Маҳмадбеков 10 000 сомонӣ мукофотпулӣ тақдим мекунад
ДУШАНБЕ, 23.10.2019 /АМИТ «Ховар»/. Кумитаи миллии олимпии Ҷумҳурии Тоҷикистон дар Чемпионати ҷаҳон оид ба дзюдо миёни ҷавонон соҳиби медали тилло ва унвони чемпионӣ гардидани паҳлавони маъруфи тоҷик Сомон Маҳмадбековро қадрдонӣ карда, ӯро бо мукофотпулӣ дар ҳаҷми 10 000 сомонӣ қадрдонӣ менамояд. Мукофоти мазкур 24 октябр дар Фурудгоҳи байналмилалии Душанбе зимни маросими бошукӯҳи пешвозгирии паҳлавони маъруфи тоҷик Сомон Маҳмадбеков тақдим мегардад. Дар ин бора намояндаи расмии Кумитаи миллии олимпии Тоҷикистон Умаралӣ Сафаралӣ ба шореҳи варзиши АМИТ «Ховар» Меҳрони Қурбон хабар дод.
Ёдовар мешавем, ки Сомон Маҳмадбеков дар Чемпионати ҷаҳон оид ба дзюдо миёни ҷавонон, ки 17-20 октябр дар шаҳри Марокаш доир гардид, дар вазни -73 кг бар варзишгарони Кеп Верд (Семедо Клаудиано), Қирғизистон (Асад Масабиров), Белгия (Абдул Малик Умаев), дар чорякфинал бар намояндаи Италия (Эдуардо Мелла), дар нимфинал бар Самуэл Гасснер аз Австрия ва дар финал бар Георгий Элбакиев аз Россия дастболо шуда, унвони чемпиони ҷаҳонро миёни ҷавонон сазовор гардид.
Паҳлавони тоҷик баъд аз ин пирӯзӣ дар раддабандии олимпии вазни 73 килои Федератсияи ҷаҳонии дзюдо аз ҷои 21-ум ба мақоми 14-ум ва дар раддабандии ҷаҳонӣ аз ҷои 31-ум ба ҷои 19-ум баромад.
Қобили зикр аст, ки Сомон Маҳмадбеков аз дастгирии молиявии Кумитаи миллии олимпии Тоҷикистон ҳар моҳ дар ҳаҷми 300 доллари ИМА бархурдор буда, охири сол барои ин дастовардаш дар ҳаҷми 50 000 сомонӣ бо Ҷоизаи Президенти ҷумҳурӣ сарфароз мегардад.
Сомон Маҳмадбекови 20-сола шурӯъ аз соли 2015 дар мусобиқаҳои байналмилалии дзюдо иштирок мекунад ва то ин вақт медалҳои тиллои Ҷоми Африқо миёни ҷавонон (Тунис, 2017), Ҷоми Аврупо миёни ҷавонон (Арад, 2017), Ҷоми Осиё миёни калонсолон (Ҳанг Конг, 2018), медали нуқраи Ҷоми Аврупо миёни ҷавонон (Коимбра, 2018), медали биринҷии Чемпионати ҷаҳон миёни ҷавонон (2017)-ро мушарраф гардида, дар Чемпионати ҷаҳон миёни калонсолон соли 2019 дар Токио маҳорати хуб нишон дода, ҷои 5-умро ишғол кард.
Дар Чемпионати ҷаҳон оид ба гӯштини миллӣ (гӯштингирӣ) варзишгарони зиёда аз 70 давлати ҷаҳон иштирок менамоянд
ВАРЗИШ — ПАЙКИ СУЛҲ, ДӮСТӢ ВА СОЗАНДАГӢ. Ҳамоиши фарҳангию фароғатӣ ва варзишию солимгардонӣ доир шуд
НИШАСТИ МАТБУОТӢ. Дар ноҳияи Шаҳритус аз рӯи 13 намуди варзиш машғулият гузаронида мешавад
10 АВГУСТ — РӮЗИ ВАРЗИШГАРОНИ ТОҶИКИСТОН. Теъдоди иншооти соҳаи варзиш беш аз 9 маротиба афзоиш ёфтааст
Дастаи мунтахаби Тоҷикистон дар Чемпионати расмии ҷаҳон оид ба ҷиу-ҷитсу соҳиби 9 медал гардид
Бахшида ба Рӯзи варзишгарони Тоҷикистон дар ноҳияи Фирдавсии пойтахт ҳамоиши тантанавӣ доир шуд
ФУТБОЛ. Доварони Тоҷикистон дар семинари доварони элитаи КФО дар Тошканд иштирок намуданд
Намояндагони Федератсияи футболи Тоҷикистон дар семинар барои комиссарони нави бозиҳои CAFA иштирок карданд
ФУТБОЛ. Пагоҳ бозиҳои даври 13-уми Чемпионати Тоҷикистон байни дастаҳои Лигаи олӣ оғоз мегардад
Варзишгари ҷавони тоҷик дар Чемпионати ҷаҳон оид ба гӯштини юнону румӣ соҳиби медали нуқра гардид
Варзишгарони тоҷик ба хазинаи варзишии Тоҷикистон 278 медал ворид намуданд
Варзишгари Тоҷикистон дар мусобиқаи байналмилалии теннис соҳиби ду медали тилло шуд
