Дар Душанбе Конфронси XXIХ ҳисоботӣ-интихоботии ташкилоти ноҳиявии ҲХДТ баргузор гардид

ДУШАНБЕ, 01.11.2019 /АМИТ «Ховар»/. Имрӯз дар шаҳри Душанбе Конфронси XXIХ ҳисоботӣ-интихоботии ташкилоти  Ҳизби Халқии Демократии Тоҷикистон (ҲХДТ) дар ноҳияи Исмоили Сомонӣ  баргузор гардид. Дар ин бора мухбири АМИТ «Ховар» иттилоъ медиҳад.

Дар конфронси мазкур намояндагони Дастгоҳи иҷроияи Президенти Ҷумҳурии Тоҷикистон, Кумитаи иҷроияи марказии ҲХДТ, кумитаҳои иҷроияи ҲХДТ дар шаҳри Душанбе, ноҳияи Исмоили Сомонӣ ва дигарон иштирок намуданд.

Раиси Кумитаи иҷроияи ҳизб дар ноҳияи Исмоили Сомонӣ Насимҷон Расулзода оид ба фаъолияти Кумитаи иҷроия аз моҳи июли соли 2017 то моҳи октябри соли 2019 ҳисобот дода, вазифаҳои минбаъдаи онро муайян намуд.

Зикр гардид, ки мақсад ва ҳадафи ҲХДТ таъмини ҳуқуқу озодиҳои инсон ба фазилатҳои баланди сиёсӣ, сифатҳои наҷиби ахлоқӣ, мустаҳкам намудани истиқлолияти сиёсию иқтисодӣ, иҷтимоиву фарҳангӣ, инчунин иттиҳоди нерӯҳои солимӣ ҷомеа ва бо ин роҳ баланд бардоштани некуаҳволии халқ ҷиҳати таъмини зиндагии шоистаи ҳар як сокини мамлакат равона гардидаанд.

Дар конфронс ҳисоботи Комиссияи тафтишотии ташкилотҳои ҲХДТ дар ноҳияи  Исмоили Сомонии  шаҳри Душанбе оид ба фаъолияти молиявии он дар давраи ҳисоботӣ шунида шуд.

Вакилони Конфронс оид ба масъалаҳои баррасишуда қарорҳои дахлдор қабул намуда, 102 нафар вакил барои иштирок дар Конфронси XVIII ҳисоботӣ-интихоботии ташкилотҳои ҲХДТ дар шаҳри Душанбе пешбарӣ карда шуданд.

Ёдовар мешавем, ки як гурӯҳ аъзои фаъоли Ҳизби Халқии Демократии Тоҷикистон, ки дар татбиқи ҳадафҳои созандаи барномаҳои ҳизб саҳми назаррас гузоштаанд, бо Ифтихорнома, Сипосномаи   мақомоти болоии ҳизбӣ қадрдонӣ гардиданд.