Ғолибони Озмуни «Соҳибкори беҳтарини шаҳри Душанбе дар соли 2018» қадрдонӣ шуданд

ДУШАНБЕ, 26.11.2019. /АМИТ «Ховар»/. Имрӯз бо ташаббуси мақомоти иҷроияи ҳокимияти давлатии шаҳри Душанбе  дар Муассисаи давлатии «Душанбе-Плаза» маросими тантанавии ҷамъбасти Озмуни «Соҳибкори беҳтарини шаҳри Душанбе дар соли 2018»  доир шуд. Ҷоми фахрии  озмуни мазкур  насиби ғолиби номинатсияи «Истеҳсоли масолеҳи сохтмон ва конструксияҳо»-Ҷамъияти саҳомии пӯшидаи «Заводи асфалту бетон»-и  шаҳри Душанбе гардид. Ғолибони озмун   аз рӯи 18 номинатсия  бо ҷоиза, инчунин  як зумра соҳибкорони пойтахт  барои иштироки фаъолона  дар ин озмун бо  «Сипоснома»-и Мақомоти иҷроияи ҳокимияти давлатии шаҳри Душанбе қадрдонӣ шуданд.

Тавре мухбири АМИТ «Ховар» хабар медиҳад, маросими ҷоизасупорӣ бо намоиши филми ҳуҷчатӣ дар бораи рушди соҳаи саноати шаҳри Душанбе ифтитоҳ гардид.

Сипас сардори Раёсати сармоягузорӣ ва идораи амволи давлатии шаҳри Душанбе  Мустафо Шоҳталбзода маросимро ифтитоҳ намуда, зикр кард, ки Озмуни «Соҳибкори беҳтарини шаҳри Душанбе» дар асоси қарори Раиси шаҳр Рустами  Эмомалӣ роҳандозӣ гардида,  ҳадаф аз баргузории он   баланд бардоштани  нуфузи соҳибкорон дар ҷомеа, таблиғи дастовардҳои бунёдкоронаву созандаи онҳо, дастгирии ҳамаҷониба ва ҳавасмандгардонии тоҷирон  бо мақсади рушди минбаъдаи соҳибкорӣ дар пойтахт, ғанӣ гардонидани бозори истеъмолию буҷети шаҳр   ва  муҳайё намудани шароити мусоид барои ҷалби сармоягузорони ватанӣ  мебошад.

«Агар соли 1991 дар шаҳри Душанбе теъдоди соҳибкорон 14 ҳазорро ташкил медод, алҳол дар пойтахт  ин шумора ба  42 ҳазору 210 нафар  расидааст, ки ин нишондод аз рушди соҳаи мазкур  дар шаҳр гувоҳӣ медиҳад»,- гуфт номбурда

Баъдан  қисмати  супоридани ҷоизаҳо сурат гирифт. Онҳоро  муовинони Раиси шаҳри Душанбе Умед Гуреззода ва Фаррух Ҷумазода ба ғолибон тақдим намуданд. Дар натиҷаи ҷамъбасти озмун   Ҷамъияти саҳомии  пӯшидаи «Комбинати шири Душанбе»   дар номинатсияи «Истеҳсоли молҳои истеъмолии халқ», Ҷамъияти дорои масъулияти маҳдуди  «Иттиҳодияи истеҳсолии Нассоҷии Тоҷик» дар  номинатсияи «Истеҳсоли маҳсулоти саноати сабук», ҶДММ  «Тоҷик мебел» дар  номинатсияи «Истеҳсоли маҳсулоти истифодаи саноат», ҶСП «Техноинвест» дар  номинатсияи «Сохтмон, тармим ва таъмир», ҶСП «Заводи асфалту бетон» дар номинатсияи «Истеҳсоли масолеҳи сохтмон ва конструксияҳо», ҶДММ «Рамзан Сохтмон» дар номинатсияи «Меъморӣ ва дизайн»,  ҶДММ  «Рухом» дар номинатсияи «Косибӣ ва ҳунарҳои халқӣ», ҶДММ «Баракати Сол» дар номинатсияи «Хӯроки умум», ҶДММ  «Газпром-нефт Таджикистан» дар  номинатсияи «Савдо», ҶСП  «Торгмаш» – номинатсияи «Хизмати маишӣ», ҶДММ  «Фавз» дар номинатсияи «Хоҷагидории шаҳрӣ, хизматрасонии манзилию коммуналӣ ва экология», ҶДММ  «Тиб барои  Шумо» дар номинатсияи «Истеҳсоли доруворӣ, маҳсулот ва таҷҳизоти тиббӣ», ҶДММ  «Жасмин» дар номинатсияи «Хизматрасонии тиббӣ», ҶДММ «Интер Фитнес» дар  номинатсияи «Хизматрасонӣ дар соҳаи  фарҳанг, варзиш ва туризм», ҶДММ  «РСМ Тоҷикистон» дар номинатсияи «Хизматрасонӣ барои рушди соҳибкорӣ: таълим, маркетинг, аудит, консалтинг, пешбарии муҳосибот ва кумаки ҳуқуқӣ», ҶДММ «Кашфиёт Таҳлил Машварат» дар номинатсияи «Фаъолияти нашриётӣ, хизматрасонии полиграфӣ, дизайн ва реклама», ҶСП  «ТТ Мобайл» дар номинатсияи «Технологияҳои телекоммуникатсионӣ», ҶДММ  Ширкати  телевизион ва радиои «Азия-Плюс» дар номинатсияи «Технологияҳои ахборӣ» ғолиб дониста шуданд.

Ғолибони озмун аз рӯи ҳар як номинатсия бо диплом ва туҳфаҳои хотиравии   мақомоти иҷроияи ҳокимияти давлатии шаҳри Душанбе  сарфароз  гардонида  шуданд.

Ҳамчунин ҷамъиятҳои дорои масъулияти маҳдуди «Лаззат», «Нурабис», «Имдоди Ғайрат», «Султони Кабир», «Паймон-2013», «Сафариён», «Мавҷи истиқлол», «Муассисаи сайру саёҳати Иттифоқи Тоҷикистон», «Маркази тибби Аҳрориён», «Шоҳёр», «Сифати саноат», «Кӯҳҳои Тоҷикистон», «Сифат фарма», «Ширкати соҳибмулкони Аҳрор Мухторов», «Зафар иншоот», «Дуто», «Тарабхонаи «Ҷавонон», «Шаҳзода», Бунёди ҷаҳони орзуҳои Шумо»,

«Душанбе –Принт», «Эрграф»,  инчунин Ҷамъияти саҳомии пӯшидаи «Нур Пласт» ва  Ҷамъияти саҳомии кушодаи «Континент –Инвест»,  сардори Раёсати сармоягузорӣ ва идораи амволи давлатии шаҳри Душанбе  Мустафо Шоҳталбзода  ва директори Муассисаи давлатии «Душанбе –Плаза»  барои  иштироки фаъолона дар озмуни мазкур бо «Сипоснома», «Диплом» ва туҳфаҳои хотиравии Мақомоти иҷроияи ҳокимияти давлатии шаҳри Душанбе  қадрдонӣ гардиданд.

Ба маросими тантанавӣ   ҳунарнамоии  устодони санъати тоҷик, аз ҷумла Ҷамшед Исмоилов, Шуҳрат Сайнаков, Иззат Шарифӣ, Лола Азизова, Рӯзибой Идиев, Соҳиб Назриев ва дигарон шукӯҳи хосса бахшид.

Рухсораи НУР,
АМИТ «Ховар»