ҲИЗБИ ОРМОНҲОИ МИЛЛӢ. Аз таъсиси Ҳизби Халқии Демократии Тоҷикистон чаҳоряк аср сипарӣ гардид. Мулоҳизаҳои сармуҳаррири нашрияи Кумитаи Иҷроияи ҲХДТ дар шаҳри Душанбе «Мароми пойтахт» ба ин муносибат

ДУШАНБЕ, 15.12.2019 /АМИТ «Ховар»/. 10 декабр аз таъсиси Ҳизби Халқии Демократии Тоҷики­стон 25 сол сипарӣ гардид.  Ба ин муносибат сармуҳаррири нашрияи Кумитаи Иҷроияи ҲХДТ дар шаҳри Душанбе «Мароми пойтахт», номзади илмҳои филологӣ Ҳақназар КАРИМЗОДА андешаҳояшро зимни як нигориш ба АМИТ «Ховар» ирсол намудааст, ки дар зер онро пешниҳоди хонандагон менамоем.

— Тавре Президенти Ҷумҳурии Тоҷикистон, Раиси   муаззами ҲХДТ  муҳтарам Эмомалӣ  Раҳмон иброз медоранд: «ҲХДТ дар давраи сарнавиштсоз ба фаъолият шурӯъ намуда, ҳадафи аслиаш ваҳдату  ягона­гӣ, устувориву пойдории сулҳ ва таъмини ояндаи неки шаҳрвандони  мамлакат  аст».

Воқеан ҳам  ҲХДТ тӯли 25 соли фаъолияти пурсамар зери шиори «Барои ваҳдати миллӣ, сулҳу оромӣ, суботи сиёсӣ, созандагиву ободонӣ, рушди устувори иқтисодӣ ва зиндагии шоистаи мардум» ҷомеаро ба марҳилаҳои сифатан нав расонид.

Албатта, ин марҳила барои камолоти як ҳизби сиёсӣ чандон давраи тӯлонӣ ба ҳисоб намеравад. Вале ба ин нигоҳ  накар­да, ҲХДТ роҳеро паймуд, ки арзиши даҳ­солаҳоро дорад.

Ҳизби мо   шабоҳат ба обе дошт, ки онро ба дашти лабташнае сар дода бошӣ. Аз ин рӯ, дар як муддати кӯтоҳи таърихӣ мардумон   онро  чун  обу  ҳавое, ки бе он зистан ғайриимкон  аст, пазируфт ва ба он эътимод кард. Ҳамин тариқ, пайванди ҳизб бо мардум шурӯъ  шуд. Тавре Пешвои муаззами  миллат, Раиси ҲХДТ муҳтарам Эмомалӣ Раҳмон дар маҷлисҳои Кумитаи Иҷроияи Марказии Ҳизби  Халқии Демократии Тоҷикистон борҳо иброз дошта­анд: «Ҳизби мо зодаю парвардаи замони соҳибистиқлолии Тоҷикистон аст ва худро бо мардум чун ҳизби дорои масъулияти баланди сиёсӣ муаррифӣ намудааст, ки ин заминаи воқеии таърихӣ дорад».

Агар ба таърихи ташаккулёбӣ ва гу­старда шудани нуфузи ҲХДТ дар ҷомеа назар афканем, бармалост, ки давраи та­шаккулёбии ҳизб маҳз ба фаъолияти роҳ­барии фарзанди соҳибфитрати тоҷикон, муҳтарам Эмомалӣ Раҳмон рост меояд. Бо интихоби Эмомалӣ Раҳмон минҳайси Раиси ҲХДТ ва роҳбарии хирадмандонаи ин абармарди майдони сиёсат эътибори ҳизб, мақому мартабаи онҳое, ки шарафи узвияти ин неруи тавонои сиёсиро до­штанд, ба маротиб боло рафт ва муҷиби густардатар шудани нуфузи ҳизб дар наз­ди сохторҳои дахлдори ҳокимияти иҷроияи давлатӣ гардид.

Ё ба таъкиди   доктори илмҳои фалсафа Саидму­род Фаттоҳзода, ки дар мақолаи худ «Ҳиз­би ормонҳои миллӣ ва ё андеша пирому­ни ҳизби мардумие, ки зодаи тафаккури Пешвои миллат аст», чунин меорад: «Дар хотир дорам, ки ҳамеша дар давраҳои ин­тихобот рақибони сиёсӣ ва ҳатто баъзан ҳамсафони мо муваффақияту пирӯзиҳои Ҳизби Халқии Демократии Тоҷикистонро ба обрӯву нуфузи Раиси он, Эмомалӣ Раҳмон алоқаманд медонистанд. Сари ин масоили мавриди назар мо бояд талош ҳам накунем. Чунки Ҳизби Халқии Демократии Тоҷикистон маҳз зодаи тафаккури Роҳбари хирадпешаи он аст, ки ҷавҳараш аз арзишҳои таърихӣ, миллӣ, фарҳангӣ ва орзую ормонҳои ҳазорсолаи халқи тоҷик сиришта шудааст. Фаъолияти ҳизб бо сиёсати хирадмандонаи асосгузори он сахт алоқаманд аст, аз ин лиҳоз  маҳбубияти он бо истеъдоди фитрии сарвараш иртиботи ногусастанӣ дорад».

Мавқеи мо низ ба назару андешаи доктори илмҳои фалсафа Саидмурод Фат­тоҳзода комилан мувофиқ аст, зеро маҳз иқдомоти дурандешона ва  хирадмандонаи Ҷаноби Олӣ, муҳтарам Эмомалӣ Раҳмон дар мавриди таҳтироҳбарии худ гириф­тани ин ниҳоди сиёсӣ — ҲХДТ ба раванди инкишофу фаъолияти густурдаи худ ворид гашт.

Таърихи навини давлати  соҳибистиқлоламон гувоҳ аст, ки Ҳизби Халқии Демократии Тоҷикистон дар давраи ниҳо­ят мураккаби таърихӣ, бо мақсади ҳифзи манфиатҳои миллӣ, истиқлоли давлатӣ ва таъмини якпорчагии мамлакат ташкил ёфта, дар як муддати кӯтоҳ  тавонист ба як ташкилоти бонуфузи сиёсӣ, такягоҳи боэътимод, ҳизби ормонҳои миллӣ ва до­рои сохтори муназзаму мураттаби ташкилӣ табдил ёбад. Маҳз ҳами навомил сабаб шуд, ки аксари мардум ғояҳои сиёсию иҷтимоии онро дастгирӣ карданд. ҲХДТ тавассути сиёсати бунёдкорона ва татбиқи собитқадамонаи Барномаи худ, бо такя ба масъулиятшиносию қудрати зеҳнии аъзо­яш ва дастгирии бештари қишрҳои дигари солимфикри ҷомеа дар барқарор намудани сулҳу ваҳдати миллӣ ва гузаронидани ис­лоҳоти сиёсию  иқтисодӣ  талош варзида, дар ташкили сохторҳои нави давлатӣ саҳ­ми намоён гузошт.

Пӯшида нест, ки меҳвари фаъолияти  ҳар як ташкилот ё ҳаракати  сиёсӣ ин фаъо­лияти ғоявии он мебошад. Ҳар як ҳизб ғояи худро дорад, ки бо шаклу усул ва васои­ту роҳҳои гуногун кӯшиш менамояд, онро амалӣ созад. ҲХДТ таҳти роҳбарии муҳта­рам Эмомалӣ Раҳмон тавассути татбиқи иҷрои хостаҳои  доманадору пурсамари худ исбот намуд, ки дар низоми сиёсии ҷоме­аи Тоҷикистон ба яке аз омилҳои муҳими таъсиррасонии сиёсӣ ва неруи пешбари ҷомеаи навини тоҷикон табдил ёфтааст.

Чунон чи  медонем, Ҷумҳурии  Тоҷикистон дар остонаи маъракаи муҳими сиёсии интихоботи навбатии Маҷлиси Олӣ ва маҷ­лисҳои маҳаллии вакилони халқ қарор до­рад. Аз ин рӯ, пӯшида нест, ки ҲХДТ бо рӯҳияи баланди сиёсӣ ва дарки амиқи ма­съулияти баланди неруи пешбари ҷомеа таҳти сарварии Раиси муаззами ҲХДТ, Президенти Ҷумҳурии Тоҷикистон муҳта­рам Эмомалӣ Раҳмон барои дар сатҳи ба­ланди мардумсолорӣ ва озоду шаффоф гузаронидани он омодагии ҳаматарафа дида, талош бар он мекунад, ки ҳадафи аслиаш – таъмини зиндагии арзандаи халқ зина ба зина амалӣ  гардад.

Агар ба саҳифаҳои рангини баргузо­рии анҷуманҳои ҳизб назар  афканем, му­шаххас мешавад, ки Анҷумани ХII Ҳизби Халқии Демократии Тоҷикистон таърихи 13-уми декабри соли 2014 баргузор гар­дидааст ва дар он муҳимтарин масоили ҷомеа мавриди баррасии амиқ қарор ги­рифтаанд.

Тавре Раиси ҲХДТ, муҳтарам Эмомалӣ Раҳмон дар ин Анҷуман иброз  доштаанд: «Ҳизби мо ба сифати неруи муқтадири сиёсии  мамлакат  барои воқеан ҳам амалӣ гардидани озодиҳои  сиёсиву  иқтисодӣ, аз қабили гуногунандешӣ, бисёрҳизбӣ, озо­дии сухан, матбуот ва эътиқод, интихобо­ти шаффофу демократӣ, волоияти қонун, иқтисодиёти  гуногуншакл, рақобати озоди иқтисодӣ, рушди соҳибкории хурду миёна, ташаккули ҷомеаи шаҳрвандӣ ва монанди инҳо ҳам чун ҳадафҳои барномавии худ то имрӯз талош меварзад. Натиҷа  ҳамин   аст, ки   намояндагони аксари қишрҳои ҷомеа ифодаи манфиатҳояшонро дар барномаи ин ҳизб мебинанд ва  онро ҷонибдорӣ ме­кунанд».

Ҳамин тариқ, итминонамон  комил   аст, ки бо натиҷагирӣ аз фаъолияти пурсамару чашмраси ҲХДТ ва назари  чанде аз оли­мону коршиносони соҳа имрўзҳо метавон хулоса кард, ки Ҳизби Халқии Демократии Тоҷикистон таҳти роҳбарии Асосгузори сулҳу ваҳдати миллӣ – Пешвои  миллат, Пре­зиденти Ҷумҳурии Тоҷикистон, Раиси му­аззами ҲХДТ муҳтарам Эмомалӣ Раҳмон бо сиёсати дурбинонаи худ бештару пеш­тар аз ҷониби қишрҳои мухталифи ҷомеа дастгирии амиқ меёбад ва дар маъракаҳои муҳими сиёсии дар пешистода ҷонибдории аксарияти мардумро ба даст оварда, ғолибу пирӯз х оҳад  гардид.

Ҳақназар КАРИМЗОДА,
номзади илмҳои филология