Барои навсозии инфрасохтори троллейбусҳои Душанбе 8 миллион доллар ҷудо мегардад

ДУШАНБЕ, 07.01.2020 /АМИТ «Ховар»/. Барои навсозии инфрасохтори  троллейбусҳои  шаҳри Душанбе  Бонки Аврупоии Таҷдид ва Рушд (БАТР) 8 миллион доллар ҷудо мекунад. Ин маблағ барои таъмири зеристгоҳҳои мавҷуда, насби ноқилҳои фидерӣ, инчунин хатҳои троллейбус ва пойгоҳҳои он равона  гардида, 5,2  миллиони он  бо  кафолати давлатӣ ба сифати  қарз ва 2,8 миллион доллараш  дар шакли гранти сармоягузорӣ ҷудо карда мешавад.

Тавре роҳбари гурӯҳи татбиқи лоиҳаи «Рушди нақлиёти истифодаи умум  дар шаҳри Душанбе» Абдулхайр Алиев ба  хабарнигори АМИТ «Ховар» иттилоъ дод, барқарорсозии инфрасохтори троллейбусҳо ба  рушди соҳа ва беҳтар гардидани фаъолияти  ин воситаи мусофиркаш  мусоидат карда, имкон  фароҳам меорад, ки сокинону меҳмонони пойтахт аз  хизматрасонии ин нақлиёти каммасрафи ҷамъиятӣ ва аз лиҳози экологӣ тоза бештар истифода баранд.

Тибқи иттилои номбурда, айни замон дар  7 хатсайри троллейбусии шаҳри Душанбе 87 адад воситаҳои нақлиёти барқии корхона ба сокинону меҳмонони шаҳр  хизмат мерасонанд. Онҳо дар як сол беш аз 11 миллион  мусофирро  интиқол медиҳанд.

Ёдовар мешавем, ки моҳи майи соли 2019 бо иштироки Раиси шаҳри Душанбе Рустами Эмомалӣ дар Корхонаи коммуналии воҳиди давлатии «Троллейбус»-и шаҳри Душанбе маросими рӯнамоии троллейбусҳои муосири тамғаи 3321 00 D, ки аз Ҷумҳурии Беларус дастрас гардидаанд, баргузор шуд. Ин  троллейбусҳои муосири минтақаи Осиёи Марказӣ бори аввал ба шаҳри Душанбе оварда шуданд.

Ба иттилои Абдулхайр Алиев, троллейбусҳои ширкати «Белкоммунмаш» тариқи ноқил ва ҳангоми қатъ гардидани қувваи барқ то 15 километр ба воситаи батарея ҳаракат мекунанд. Арзиши як адад чунин троллейбус қариб 250 ҳазор доллари америкоиро  ташкил медиҳад. Иқтидори ғунҷоиши  троллейбус 90 кас, ҷойи нишасти он барои 22 нафар буда, дарозиаш  12м ва бараш 2,5м мебошад. Троллейбусҳо системаи сӯхторхомӯшкунӣ,  назорати видеоӣ, кондитсионер барои  мусофирон ва кабинаи ронанда доранд. Онҳо бо механизми махсус муҷаҳҳаз шудаанд, ки фаршро коҳиш медиҳанд, то ворид шудан ба салон мувофиқ бошад. Инчунин  дар троллейбусҳои мазкур  пандус барои маъюбон мавҷуд аст.

«Фаъолияти  троллейбусҳои нав дар кӯчаю хиёбонҳои шаҳри Душанбе  бо мақсади озмоиш ба роҳ монда шудааст.  Минбаъд  харидории   100 адад чунин троллейбусҳо барои хизматрасонӣ ба мусофирон дар  пойтахт пешбинӣ шудааст»,-илова намуд номбурда.

Бояд зикр кард, ки троллейбусҳои истеҳсолнамудаи ширкати «Белкоммунмаш» дар ҳамаи минтақаҳои  Беларус фаъол буда,  инчунин ширкат бо Қирғизистон, Россия, Украина, Молдова, Руминия, Сербия, Аргентина, Колумбия ва дигар мамлакатҳои Америкаи Лотинӣ ҳамкории густурда ба роҳ мондааст.

Мақсад аз ворид намудани чунин нақлиёти замонавӣ ба шаҳри Душанбе — кам кардани танбашавии ҳаракат дар роҳҳои пойтахт мебошад.

Ёдовар мешавем, ки дар  кӯчаи марказии пойтахти Тоҷикистон – хиёбони Рӯдакии  шаҳри Душанбе  нахустин маротиба 1 майи соли 1955  троллейбусҳои аввалин ба ҳаракат даромада буданд.

Рухсораи НУР,
АМИТ «Ховар»