Дар шаҳри Роғун ҷашни Садаро пуршукӯҳ таҷлил намуданд

РОҒУН, 25.01.2020 /АМИТ «Ховар»/. Ба муносибати ҷашни пуршукӯҳи Сада дар маркази шаҳри Роғун ҳамоиши идона баргузор гардид. Дар он маҳсулоти кишоварзон ва дастранҷи заҳматкашон ба маърази сокинони шаҳр пешниҳод гардид. Афрӯхтани гулхан, нақшу нигор ва гӯшаи ҳунарҳои дастии сокинони шаҳри Роғун ба ҳусни ҳамоиш таровати тоза зам намуд.

Дар ин бора мудири шуъбаи рушди иҷтимоӣ ва робита бо ҷомеаи шаҳри Роғун Абдулмумин Худойдодов ба хабарнигори АМИТ «Ховар» иттилоъ дод.

Дар ҳамоиш раиси шаҳри Роғун Музаффар Сулаймонзода ҳозиринро бо ин иди фархунда табрик гуфта, иброз дошт, ки “Сада яке аз куҳантарин ҷашнҳои мардуми ориёинажод буда, гузаштагонамон онро ҳамчун рамзи аҳду паймон ва дӯстиву муҳаббат, мужда аз фасли зебои сол, яъне баҳор ва оини меҳрпарастӣ таъбир кардаанд. Ин ҷашн ба ҷузъи таркибӣ ва ҷудонопазири анъанаҳои миллии мо табдил ёфта, мардуми қадимӣ ва кишоварзу косиб будани ориёитаборонро исбот менамояд.

Маросиму суннатҳои ин ҷашни бостонӣ гувоҳӣ медиҳанд, ки тоҷикон ва дигар халқҳои ориёӣ аз қадим ба заминдорӣ, ҳунармандӣ ва чорводорӣ машғул буда, ба табиат муҳаббати хосса доштаанд. Онҳо дигаргуниҳои табиатро эҳсос карда, барои қонеъ сохтани ниёзҳои рӯҳиву равонии худ ойину ҷашнҳо эҷод кардаанд, ки умеду орзуи одамон дар онҳо самимӣ, табиӣ ва гуворо ифода ёфтаанд”.

Зикр гардид, ки таҷлили расмии иди мазкур далели он аст, ки мардуми шарафманди шаҳри Роғун  дар партави сиёсати Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рӯ ба арзишҳои гузаштаи фарҳангии хеш оварда, эҳёи онҳоро вазифаи асосии худ медонанд.

Аз ин хотир, анъанаву расму оинҳо ва фарҳанги ғании мардуми тоҷик, ки аз қадимулайём бо замин  сару кор доштанд ва соҳиби маданияти баланди заминдорӣ буданд, то имрӯз зинда боқӣ монда,  ҳамчун ҷузъи таркибии тамаддуни умумибашарӣ барои инсоният хизмат менамоянд.