Нишасти матбуотӣ: Дар Кӯлоб 360 нафар соҳибкорро ҷарима бастанд

КӮЛОБ, 29.01.2020 /АМИТ «Ховар»/. Барои риоя накардани  қонунҳои амалкунанда, ҳуҷҷатҳои меъёрӣ ва ба муомилот баровардани маҳсулоти пастсифат дар минтақаи Кӯлоб 360 нафар соҳибкори нуктаҳои савдо ба маблағи 62 ҳазору 930 сомонӣ ҷарима баста шуданд, ки нисбат ба ҳамин давраи соли 2018 101 ҷарима зиёд мебошад.

Ин матлаб дирӯз зимни нишасти матбуотӣ бо иштироки намояндагони воситаҳои ахбори омма дар Раёсати стандартизатсия, метрология,  сертификатсия ва нозироти савдои минтақаи Кӯлоб баён гардид.

Сардори раёсат Мирзохон  Гулмаҳмадзода аз натиҷаи ҷамъбасти фаъолияти яксолаи раёсат ба  хабарнигорон  маълумот дода, афзуд, ки дар ин давра  аз тарафи шуъбаи санҷиш  оид ба риояи  талаботи  регламентҳои  техникӣ  ва ҳуҷҷатҳои  меъёрии техникӣ  дар маҷмааи агросаноатӣ  барои риояи талаботи  қонунҳои амалкунанда дар 272 корхонаи истеҳсолӣ, корхонаю ташкилот  корҳои омафаҳмонӣ ба роҳ монда шуданд.

Инчунин дар ин давра  кормандони шуъбаи нозироти савдо  аз 445  нуқтаи фурӯши маҳсулоти хӯрокворӣ  намуна барои ташхис гирифта, барои фурӯши  503 адад  фурӯзонаки тафсон,  62 адад  лампаи каммасрафи симобдор, 405 адад  бозичаи кӯдакона ва 1030  адад дафтари ғайристандартӣ амрномаи манъи фурӯш дода, онҳоро аз муомилот гирифтанд.