Олимон дурнамои бемории сироятии коронавирусро эълон карданд

ДУШАНБЕ, 28.01.2020 /АМИТ «Ховар»/. Олимони амрикоӣ ва бритонӣ тадқиқоти коршиносонаи худро дар бораи хатари паҳншавии коронавируси нави  2019-nCoV аз Чин нашр карданд.

Муҳаққиқони Маркази тиббии информатика, ҳисоббарорӣ ва омори Донишгоҳи Ланкастер, Шӯрои Тадқиқоти Тиббии Донишгоҳи Глазго (Британияи Кабир) ва Пажӯҳишгоҳи Биология ва Патогенҳои нави Донишгоҳи Флорида (ИМА) арзёбии худро дар бораи хусусиятҳои эпидемиологии коронавируси нави 2019-nCoV нашр карданд, хабар медиҳад “Арменпресс” бо истинод ба «РИА Новости».

Ба гуфтаи олимон, басомади асосии репродуктивии сироят — шумораи миёнаи сироятҳои дуюмдараҷа — аз 3,6 то 4,0 мебошад. Созмони ҷаҳонии тандурустӣ ин нишондиҳандаро дар сатҳи 1.4-2.5 арзёбӣ кард. Шакле, ки муаллифон пешниҳод кардаанд, пешгӯӣ мекунад, ки то 21 январ дар Ухан 11 341 нафар бояд сироят ёбанд. Ин маънои онро дорад, ки ҳоло сатҳи ташхиси беморӣ ҳамагӣ 5,1 дарсадро ташкил медиҳад. Агар чораҳои зидди паҳншавии беморӣ  мисли пештара боқӣ монанд, давоми 14 рӯз — то 4 феврали соли 2020 шумораи сироятёфтагон дар Ухан метавонад аз 190 ҳазор нафар зиёд шавад.

Авҷи асосии сироятёбӣ дар Шанхай, Пекин, Гуанчжоу, Чунтсин ва Ченду ба вуқӯъ хоҳад омад. Дар минтақаи хавф мамлакатҳое, ба монанди Таиланд, Япония, Тайван, Ҳонконг ва Кореяи Ҷанубӣ қарор доранд.