Дар Қазоқистон беш аз 1600 нафар барои либосе, ки чеҳраро пурра мепӯшонад, ба ҷавобгарӣ кашида шуданд

ДУШАНБЕ, 25.06.2026 /АМИТ «Ховар»/. Аз оғози соли 2026 дар Ҷумҳурии Қазоқистон беш аз 1600 нафар барои пӯшидани либосе, ки чеҳраро пурра мепӯшонад, ба ҷавобгарии маъмурӣ ҷалб гардидаанд. Дар ин хусус шабакаи телевизионии Қазоқистон бо истинод ба Вазорати корҳои дохилии Қазоқистон хабар медиҳад.

Ба иттилои манбаъ, ин маҳдудият бо мақсади таъмини амнияти ҷамъиятӣ ва имкони муайян намудани шахсият дар ҷойҳои ҷамъиятӣ ҷорӣ шудааст. Дар чунин мавридҳо чеҳраи шаҳрванд бояд барои муайян намудани шахсият намоён бошад.

Барои маротибаи  аввал вайрон намудани ин талабот одатан огоҳӣ дода мешавад. Дар  мавриди  такроран содир намудани қонунвайронкунӣ дар давоми як сол нисбат ба шаҳрванд ҷарима ба андозаи 10 нишондиҳандаи ҳисобӣ (43 ҳазору 250 танга) татбиқ мегардад.

Ҳамзамон қонунгузории Қазоқистон як қатор истисноҳоро низ пешбинӣ намудааст. Аз ҷумла, маҳдудият нисбат ба ҳолатҳое, ки чеҳра бо сабаби номусоидии обу ҳаво, нишондодҳои тиббӣ, иҷрои вазифаҳои хизматӣ ё иштирок дар чорабиниҳои фарҳангӣ пӯшонида мешавад, татбиқ намегардад.

Ёдовар мешавем, ки дар Ҷумҳурии Тоҷикистон низ масъалаҳои таъмини амнияти ҷамъиятӣ, ҳифзи тартибот ва арзишҳои миллӣ аз самтҳои муҳими сиёсати давлатӣ ба ҳисоб мераванд. Солҳои охир бо мақсади пешгирии тақлид ба фарҳангҳои барои ҷомеа бегона ва ҳифзи ҳувияти миллӣ корҳои фаҳмондадиҳӣ ва тадбирҳои гуногуни маърифатӣ таҳким бахшида  мешаванд.

Бояд тазаккур дод, ки намоён будани чеҳраи шаҳрвандон дар ҷойҳои ҷамъиятӣ ба фаъолияти самараноки мақомоти ҳифзи ҳуқуқ, муайянсозии саривақтии шахсият ва пешгирии ҳуқуқвайронкуниҳо мусоидат намуда, яке аз омилҳои муҳими таъмини амният ва суботи ҷомеа маҳсуб мешавад. Дар ин замина, таҷрибаи давлатҳои гуногун таваҷҷуҳи рӯзафзуни мамлакатҳоро ба масъалаҳои амнияти ҷамъиятӣ ва ҳифзи манфиатҳои миллӣ нишон медиҳад.

АКС аз манбаъҳои боз