Тоҷикистон ва Афғонистон ба ҳамкорӣ оид ба рафъи ҳолатҳои фавқулода тавсеа мебахшанд

ДУШАНБЕ, 29.01.2020/АМИТ «Ховар»/. Ду ҳамсоядавлат –Тоҷикистон ва Афғонистон ҳамкориро оид ба пешгирӣ ва  рафъи ҳолатҳои фавқулода тавсеа мебахшанд. Далели ин аз ҷониби вакилони палатаи поёнии Парлумони Тоҷикистон ба тасвиб расидани Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Исломии Афғонистон оид ба ҳамкорӣ дар соҳаи пешгирӣ ва рафъи ҳолатҳои фавқулода мебошад.

Зикр шуд, ки Созишнома бо мақсади таҳкими муносибатҳои анъанавии дӯстонаи байни ду давлати ҳамҷавор, ҳамкорӣ  оид ба пешгирӣ ва рафъи ҳолатҳои фавқулода,  ки метавонад  ба  осудаҳолӣ ва амнияти миллии тарафҳо мусоидат намояд, ба имзо расидааст.

Тибқи муқаррароти моддаҳои 7-11-и Созишнома  навъҳои кумак ва шартҳои убури сарҳади давлатӣ  аз  ҷониби гурӯҳҳои кумакрасон, аз ҷумла воридот, содироти таҷҳизот ва маводи таъминотӣ барои расонидани кумак ҳангоми рафъи оқибатҳои ҳолати фавқулода, истифодаи ҳавопаймо ва пардохти хароҷот амалӣ карда мешавад.

Вакилони Маҷлиси намояндагон ҳамзамон Созишномаи дастгирӣ байни шаҳри Душанбе ва Бонки Аврупоии Таҷдид ва Рушд /БАТР/ оид ба лоиҳаи «Рушди нақлиёти ҷамъиятии шаҳри Душанбе, маблағгузории иловагӣ», Созишномаи қарзӣ байни Корхонаи коммуналии воҳиди давлатии «Троллейбус»-и шаҳри Душанбе ва БАТР оид ба лоиҳаи «Рушди нақлиёти ҷамъиятии шаҳри Душанбе, маблағгузории иловагӣ»-ро ба тасвиб расониданд, ки ҳадафашон  барқарор намудани инфрасохтори троллейбус дар шаҳри Душанбе арзёбӣ мегардад.