Дар Душанбе қуръакашии Лигаи олии футболи Тоҷикистон баргузор шуд

Февраль 29, 2020 11:40

ДУШАНБЕ, 29.02.2020. /АМИТ «Ховар»/. 28 феврал дар меҳмонхонаи «Hyatt Ragency»-и шаҳри Душанбе маросими қуръакашии Чемпионати Тоҷикистон миёни дастаҳои Лигаи олӣ дар мавсими соли 2020 доир шуд. Дар ин бора шореҳи варзиши АМИТ «Ховар» Меҳрони Қурбон бо истинод ба Федератсияи футболи Тоҷикистон иттилоъ медиҳад.

Тибқи иттилои манбаъ, чемпионат дар се марҳила сурат мегирад ва ҳар даста 27 бозӣ анҷом медиҳад. Дар Чемпионати 29-уми Тоҷикистон оид ба футбол 10 даста иштирок мекунанд: «Истиқлол», «Хуҷанд», «Регар-ТадАЗ», КМВА, «Истаравшан», «Кӯктош», «Хатлон», «Локомотив-Помир», «Файзканд», «Душанбе-83».

Се дастаи охир бори аввал ба Лигаи олӣ роҳхат гирифтаанд. Қуръакашии тақвими чемпионатро футболбозони дар гузашта маъруф – Зокир Бердиқулов, Иброҳим Рабимов, Алексей Негматов ва Мансур Ҳакимов анҷом доданд. Ҷомро дар оғози маросим серҷоизатарин футболбоз дар таърихи Чемпионати Тоҷикистон Хуршед Маҳмудов, ки дар ҳайати дастаҳои «Варзоб», «Регар-ТадАЗ» ва «Истиқлол» чемпион шудааст, ба саҳна баровард.

Тибқи анъана, аввал қуръакашии ду марҳилаи чемпионат ва баъдан марҳилаи сеюм доир гашт.
Нахуст қуръакашии рақамгузории дастаҳо сурат гирифт, ки натиҷа чунин шуд:

1. «Локомотив-Помир» (Душанбе)

2. «Душанбе-83» (Душанбе)

3. КМВА (Душанбе) – Клуби марказии варзишии артиш

4. «Хатлон» (Бохтар)

5. «Кӯктош» (Рӯдакӣ)

6. «Регар-ТадАЗ» (Турсунзода)

7. «Истаравшан» (Истаравшан)

8. «Хуҷанд» (Хуҷанд)

9. «Истиқлол» (Душанбе)

10. «Файзканд» (Восеъ)

Дар асоси қуръакашӣ дар даври аввали Чемпионати Тоҷикистон дастаҳои футболи «Локомотив-Помир» бо «Файзканд», «Душанбе-83» бо «Истиқлол», КМВА бо «Хуҷанд», «Хатлон» бо «Истаравшан», «Кӯктош» бо «Регар-ТадАЗ» вомехӯранд. Баъд аз муайян шудани тақвими чемпионат дар ду марҳила муайян карда шуд, ки дар марҳилаи сеюм кадом дастаҳо дар хона ва кадом дастаҳо дар сафар бозӣ мекунанд. Дар натиҷа дастаҳо чунин рақамгузорӣ шуданд:

1. «Истаравшан» (Истаравшан)

2. «Кӯктош» (Рӯдакӣ)

3. «Регар-ТадАЗ» (Турсунзода)

4. КМВА (Душанбе)

5. «Душанбе-83» (Душанбе)

6. «Локомотив-Помир» (Душанбе)

7. «Файзканд» (Восеъ)

8. «Хатлон» (Бохтар)

9. «Хуҷанд» (Хуҷанд)

10. «Истиқлол» (Душанбе)

Хотиррасон мешавем, ки дар асоси ҷадвали Бергер дар даври ифтитоҳии марҳилаи сеюм дастаҳои футболи «Истаравшан» бо «Истиқлол», «Кӯктош» бо «Хуҷанд», «Регар-ТадАЗ» бо «Хатлон», КМВА бо «Файзканд» ва «Душанбе-83» бо «Локомотив-Помир» бозӣ хоҳанд кард.

Тибқи низомномаи чемпионат, дастаҳои Лигаи олӣ, ки дар ин мавсим ҷойҳои нуҳуму даҳумро ишғол мекунанд, дар мавсими 2021 ба лигаи аввал мегузаранд. Барандагони медалҳои тилло ва нуқраи лигаи аввал дар мавсими 2021 дар Лигаи олӣ бозӣ мекунанд.

Февраль 29, 2020 11:40

Хабарҳои дигари ин бахш

Замони баргузории бозиҳои даври 19-уми Чемпионати Тоҷикистон байни дастаҳои Лигаи олӣ муайян шуд
ҶОМИ ОСИЁ-2027. Дастаи мунтахаби Тоҷикистон тими Малдивро мағлуб намуд
ҶОМИ ОСИЁ-2027. Имрӯз дастаи мунтахаби Тоҷикистон дар марҳилаи интихобӣ бо тими Малдив бозӣ мекунад
ҶОМИ ОСИЁ-2027. Дастаи мунтахаби Тоҷикистон барои баргузории бозӣ бо Малдив ба шаҳри Мале рафт
Мусобиқаи байналмилалӣ оид ба камонварӣ ҷамъбаст гардид
Тоҷикистон дар Бозиҳои сеюми кишварҳои аъзои ИДМ соҳиби мақоми ҳафтум гардид
ҶОМИ ОСИЁ-2027. Имрӯз дастаи мунтахаби Тоҷикистон дар даври интихобӣ бо тими Малдив бозӣ мекунад
БОЗИҲОИ СЕЮМИ КИШВАРҲОИ АЪЗОИ ИДМ. То 8 октябр варзишгарони тоҷик соҳиби 22 медал гардиданд
ҶОМИ ОСИЁ-2027. Бозии Тоҷикистон ва Малдивро гурӯҳи доварон аз Қирғизистон ҳакамӣ мекунад
ФУТБОЛ. Дастаи мунтахаби Тоҷикистон дар Варзишгоҳи марказии Ҳисор бо дастаи Малдив бозӣ мекунад
Муҳиддин Асадуллоев дар Чемпионати ҷаҳон оид ба ҷудо байни ҷавонон дар Перу сазовори медали тилло гардид
Варзишгарони тоҷик дар Бозиҳои сеюми ИДМ дар Озарбойҷон соҳиби 18 медал гардиданд