Дар Таиланд табибон маҷмӯи дорувориҳоро барои табобати коронавирус омода намуданд

ДУШАНБЕ, 03.02.2020 /АМИТ «Ховар»/. Маҷмӯи дорувориҳои  зидди ВНМО ва зуком  дар табобати  бемории коронавируси 2019-nCoV дар Таиланд манфиатбахш буд, навиштааст рӯзномаи «South China Morning Post»  бо истинод ба  Вазорати тандурустии шоҳигарӣ, менигорад АМИТ «Ховар» бо такя ба ТАСС.

Зани бемори 71-сола, шаҳрванди Чин, бо нишонаҳои бемории шадиди илтиҳоби шуш ба беморхонаи  Рачавитии  Бангкок  қабул шуд. Барои табобат духтурон доруи зидди зуком «Оселтамивир»-ро, ки бо он бемориҳои роҳи нафасро  дар Шарқи Наздик  (MERS),  табобат мекарданд ва ҳамчунин дору бар зидди ВНМО  «Лопинавир/ Ритонавир»-ро  истифода намуданд. Баъди 48 соати ворид намудани дору санҷиши лабораторӣ  натиҷаи манфӣ нишон дод.

Акнун Вазорати тандурустии Таиланд  барои тасдиқ намудани маълумот натиҷаҳои  иловагии таҳқиқотро интизор аст.  Шумораи умумии гирифторони сирояти коронавирус дар ин шоҳигарӣ 19 нафар буда, беморони шифоёфта 8 нафарро ташкил медиҳанд. 382 нафари дигар бо гумони доштани ин беморӣ таҳти назорати  духтурон қарор доранд.

31 декабр  ҳукуматдорони Чин  ба Ташкилоти умумиҷаҳонии тандурустӣ  дар бораи хурӯҷи  бемории номаълуми илтиҳоби шуш дар Ухан, воқеъ дар   қисми маркази ин кишвар маълумот доданд.  Коршиносон ангезандаи ин маризиро муайян намуданд, ки он вируси 2019-nCoV  мебошад.  ТУТ   авҷ гирифтани бемории мазкурро  чун  ҳолати  фавқулодаи дорои аҳамияти байналмилалӣ эътироф  намудааст.