Ҷоми ФФТ-2020: «Хатлон», «Кӯктош» ва КМВА бар ҳарифонашон ғолиб омаданд

ДУШАНБЕ, 25.02.2020. /АМИТ «Ховар»/. Аз 23 то  24 феврал  бозиҳои даври дуюми марҳилаи ниҳоии Ҷоми Федератсияи футбол баргузор шуданд. Дар ин бора шореҳи варзиши АМИТ «Ховар» Меҳрони Қурбон бо истинод ба Федератсияи  футболи Тоҷикистон хабар медиҳад.

Тибқи иттилои манбаъ,  дастаи  футболи  «Хатлон»-и Бохтар ғалабаи дуюми пайиҳами худро дар гурӯҳи «Б» ҷашн гирифт. Шогирдони Аслиддин Ҳабибуллоев дар даври дуюм бар  дастаи футболи   «Эсхата»-и Хуҷанд бо ҳисоби 3:1 пирӯз шуданд. Дар ҳайати дастаи ғолиб Наимҷон Иброҳимзода 2 гол зад. Голи сеюми бохтариҳоро Нуриддин Ҳамроқулов дар дақиқаҳои иловагии бозӣ (90+3) ба ҳадаф расонид. Голи дастаи  «Эсхата»-ро Мубинҷон Муъминов зад. Голи Муҳсин Абдуғаффоров аз пеналтӣ ба  дастаи «Кӯктош» дар бозӣ ба муқобили дастаи «Душанбе-83» 3 хол овард.

Дар гурӯҳи «А»  бозӣ миёни дастаҳои футболи  КМВА – «Равшан» бо ҳисоби  мусовӣ – 1:1 анҷом ёфт. Ба голи задаи бозингари  дастаи  «Равшан» Саидхони Амрохон дар дақиқаи 20-ум футболбози дастаи артиш Дилшод Восиев дар дақиқаи 74 бо гол ҷавоб гардонд.

Дар бозии дигар дастаи «Локомотив-Помир» бар дастаи «Истаравшан»  бо ҳисоби 2:1 ғалаба кард. Шуҳрат Элмуродов дар дақиқаи 17 ҳисобро ба нафъи  дастаи «Локомотив-Помир» -и Душанбе кушод, бозингари Истаравшан Тулқин Умаров дар дақиқаи 30 ҳисобро баробар кард. Азизбек Ҳасанов дар дақиқаи 82 голи пирӯзиоварро ба нишон расонид.

Пас аз натиҷагирии ду давр дастаи футболи   «Хатлон»  бо 6 хол дар гурӯҳи «Б», КМВА ва «Равшан»  бо 4-холӣ дар гурӯҳи «А» пешсафанд.

Ёдовар  мешавем, ки  иштирокчиёни нимфинали Ҷоми ФФТ-2020 пас аз даври сеюм муайян мегарданд, ки 25-26 феврал доир мегардад.

Тақвими бозиҳои оянда

Даври 3-юм

25 феврал (сешанбе)
11:00 – «Душанбе-83» – «Хатлон». Ҳисор, Варзишгоҳи марказӣ
15:00 – «Куктош» – «Эсхата». Ҳисор, Варзишгоҳи марказӣ

26 феврал (чоршанбе)
10:00 – «Истаравшан» – «Равшан». Ҳисор, Варзишгоҳи марказӣ
13:00 – «Локомотив-Помир» – КМВА. Ҳисор, Варзишгоҳи марказӣ

Нимфинал

28 феврал (ҷумъа)
11:00 – 1 «А» – 2 «Б»
15:00 – 1 «Б» – 2 «А»

1 март (якшанбе)
11:00 – Бозӣ барои ҷои сеюм
15:00 – Финал