Ҷоми ФФТ-2020: КМВА, «Равшан», «Душанбе-83» ва «Кӯктош» ба даври нимниҳоӣ роҳхат гирифтанд

ДУШАНБЕ, 27.02.2020. /АМИТ «Ховар»/. Аз 25 то 26 феврал  дар Варзишгоҳи марказии шаҳри Ҳисор даври сеюми марҳилаи ниҳоии Ҷоми ФФТ-2020 баргузор шуд. Дар ин бора мухбири АМИТ «Ховар» бо истинод ба Федератсияи  футболи Тоҷикистон хабар медиҳад. Дастаҳои КМВА, «Равшан», «Душанбе-83» ва «Кӯктош» ба даври нимниҳоии Ҷоми Федератсияи футболи Тоҷикистон роҳхат гирифтанд.

Тибқи иттилои манбаъ, дар даври сеюми марҳилаи ниҳоии Ҷоми ФФТ-2020, ки дар шаҳри Ҳисор сурат гирифт,   дар гурӯҳи «Б» дастаи футболи «Кӯктош» бар дастаи «Эсхата» бо ҳисоби 4:2 ғалаба кард. Бозӣ миёни дастаҳои «Душанбе-83» – «Хатлон» мусовӣ – 1:1 анҷом ёфт. Дар гурӯҳи «А» дастаи  КМВА бар дастаи  «Локомотив Помир» бо ҳисоби 1:0 ва «Равшан» бар дастаи «Истаравшан» бо ҳисоби 3:2 ғалаба карданд.

Ҳамин тариқ, аз гурӯҳи «А» дастаҳои футболи  КМВА, «Равшан»  ва аз гурӯҳи «Б»  дастаҳои «Кӯктош», «Душанбе-83»  ба даври нимниҳоии Ҷоми ФФТ-2020 роҳ ёфтанд. Дар даври баъдӣ, ки 28 феврал доир мегардад, КМВА бо «Душанбе-83», «Кӯктош» бо «Равшан» барои баромадан ба финал қувва  месанҷанд.