Дар Ӯзбекистон шурӯъ аз 30 март ҳаракати мошинҳоро бо мақсади анҷоми корҳои шахсӣ манъ карданд

ДУШАНБЕ, 30.03.2020 /АМИТ «Ховар»/. Дар  шаҳрҳои Ӯзбекистон ҳаракат бо мошинҳои шахсӣ муваққатан манъ карда шудааст. Комиссияи  махсуси ҷумҳуриявӣ оид ба мубориза бо коронавируси ин кишвар  қарор қабул кард, ки  аз 30 март то 20 апрел ҳаракати мошинҳо бо мақсади анҷоми корҳои шахсӣ   дар шаҳрҳои Тошканд, Нукус ва дигар шаҳрҳо- марказҳои вилоятҳои  Ӯзбекистон боздошта шаванд, хабар медиҳад АМИТ «Ховар» бо истинод ба Агентии «Казинформ».

Танҳо нақлиёти  зерин — мошинҳои дипломатӣ, воситаҳои нақлиёте, ки  хизматҳои  коммуналӣ, кумаки тиббӣ,  эпидемиологӣ мерасонанд, боркашонҳое,  ки маҳсулоти кишоварзӣ интиқол медиҳанд, мошинҳои  шахсие, ки дар ҳолати зарурати кумаки  оҷили тиббӣ ба муассисаҳои тиббӣ меоянд ва аз онҷо мераванд (ҳомиладорӣ, захмҳои ҷисмоние, ки ба ҳаёт  хатар доранд), мошинҳои роҳбарони маъмурияти шаҳру ноҳияҳо, ҳамчунин муовинони онҳо, мошинҳои тобуткашонӣ, мошинҳои ёрии таъҷилии тиббӣ, нақлиёти назораткунанда, нақлиёти муассисаҳои алоқа ва мошинҳои интиқоли ғизо, ҳамчунин мошинҳои бонкҳои тиҷоратӣ метавонанд бе иҷозати махсус дар шаҳр ҳаракат кунанд.

Хотирнишон месозем, ки  аз 29 март додани иҷозатномаҳои махсус (стикерҳо ) барои мошинҳое,  ки метавонанд дар давраи амал кардани маҳдудият ҳаракат намоянд, шурӯъ шудааст. Ҳаракати мошинҳо бо мақсади анҷоми корҳои  шахсӣ  қатъиян  манъ аст.