Саидҷалол Саидов ва Шакармамад Мирмамадов шоҳҷоизаҳои мусобиқаи гӯштинро дар ноҳияи Темурмалик ба даст оварданд

ДУШАНБЕ, 29.03.2020. /АМИТ «Ховар»/.  Бахшида ба ҷашни аҷдодии тоҷикон-Наврӯзи хуҷастапай дар Ҷамоати деҳоти Чилчаи ноҳияи Темурмалик мусобиқаи гӯштин  баргузор шуд. Дар он беҳтарин гӯштингирон аз минтақаҳои гуногуни мамлакат ширкат варзиданд. Дар ин бора  мухбири АМИТ «Ховар»  Меҳрони   Қурбон хабар медиҳад.

Дар мусобиқаи мазкур, ки дар он беш аз 15 ҳазор тамошобинон ҷамъ омада буданд, дар марҳилаи асосӣ  паҳлавонони шинохтаи мамлакат- Темур Раҳимов, Шакармамад Мирмамадов, Саидҷалол Саидов, Хуршед Маҷидов, Фирдавс Насимов ва дигарон рақобатҳои ҷолибу диданӣ нишон доданд.

Қобили зикр аст, ки дар баробари ду Шоҳҷоиза –мошини сабукрав масъулини чорабинӣ ҷоизаҳои зиёди пулию молӣ таъсис доданд. Ҳамин тариқ, баъд аз рақобатҳои ҷолиб барои Шоҳҷоизаи аввал Саидҷалол Саидов бо Шариф Назриев ба майдон баромаданд. Қувваозмоии ин ду паҳлавони шинохта дуру дароз идома карда, ниҳоят бо як партофти зебои Саидҷалол Саидов анҷом ёфт.

Дар рақобати дигар барои бурди Шоҳҷоиза Шакармамад Мирмамадов бо Шоҳрух Амирхонов қувва санҷид. Дар вохӯрии мазкур баъд аз қарори доварон бартарӣ ба Шакармамад Мирмамадов дода шуд.

Хотиррасон мекунем, ки қабл аз ин Шакармамад бо Хуршед Маҷидов майдондорӣ намуд ва ин вохӯрӣ бо натиҷаи мусовӣ хотима ёфта буд. Мусобиқаи гӯштини миллӣ дар Ҷамоати деҳоти Чилчаи ноҳияи Темурмалик дар фазои хотирмон анҷом пазируфт.