Дар деҳаи Савноби водии Бартанг сохтмони неругоҳи хурди барқӣ оғоз гардид

ХОРУҒ, 19.04.2020 /АМИТ «Ховар»/. Дар деҳаи Рошорви Ҷамоати деҳоти Савноби ноҳияи Рӯшони Вилояти Мухтори Кӯҳистони Бадахшон  неругоҳи хурди барқӣ бо тавоноии 450 киловат бунёд мешавад. Барои бунёди ин неругоҳи хурд зиёда аз 11 миллион сомонӣ ҷудо шудааст.

Неругоҳи мазкур аз ҷониби ширкати «Помирэнерҷӣ» дар ҳамкорӣ бо Ҳукумати ҷумҳурӣ ва шарикони рушд бо мақсади беҳтар намудани сифати зиндагии сокинони деҳоти водии Бартанги ноҳияи Рӯшон сохта мегардад.

Бо мусоидати мақомоти иҷроияи ҳокимияти  давлатии вилоят  ширкати «Помир-энерҷӣ»  тирамоҳи  соли  гузашта таҳкурсии  неругоҳи барки обии хурдро дар маҷрои дарёчаи  кӯҳии Хатфат гузошт. Корҳои сохтмониро Ҷамъияти дорои масъулияти маҳдуди  «Мадад»   ба уҳда гирифт.

Муҳандиси ширкати мазкур Асад Саидмамадов гуфт, ки “ин деҳаҳои дурдасти водии Бартанг дар маконҳои дастнорас ва доманакӯҳҳо ҷойгиранд. Аз ин рӯ интиқол додани техникаву механзимҳо ва масолеҳи сохтмонӣ  ба он ҷо хеле душвор аст. Сарфи назар аз ин мушкилот ширкати «Помирэнерҷӣ» тасмим гирифт, ки марҳила ба марҳила сокинони ин водиро бо барқ таъмин намояд. То ба имрӯз сад фоизи қубурҳои обгузар аз тарафи ҶДММ «Мушарраф» ба маҳали сохтмон интиқол дода шуданд.  Истеҳсоли таҷҳизоти электротехникии заруриро  ширкати «HydroTu» -и Чин ба анҷом расонд ва мувофиқи нақша, ин таҷҳизот бояд  моҳи феврали соли равон  ба  Ҷумҳурии Тоҷикистон  ворид мешуданд, аммо бо сабаби хурӯҷи бемории короновирус   дар Ҷумҳурии Мардумии Чин интиқоли  ин таҷҳизот ба вақти номуайян ба таъхир гузошта шуд”.

Ҳоло сарфи назар аз иқлими номусоид ва боронгарӣ самти рӯдхонаи Хатфат тағйир дода шуда, кандани хандақ барои васл намудани қубурҳои обгузар оғоз ёфта, ҳамворкунии майдони сохтмон ба анҷом расонида шуд. Ба сохтмони неругоҳи хурди обӣ 50 нафар ҷавонони маҳаллӣ ҷалб шудаанд. Ба маҳали сохтмон ҳамчунин 3 эксковатор, 2 мошини калони боркаш, 2 булдозер, 1 адад манипулятор ва 1 адад генератори дизелӣ бо тавоноии 80 кВт интиқол дода шуданд.

Анҷоми  сохтмони  ин неругоҳи хурди обӣ мувофиқи нақша  мохи сентябри соли равон дар назар дошта шудааст. Баъди ба истифода додани неругоҳи мазкур  180 хонаводаи деҳаи Рошорви водии Бартанг бо барқи хушсифат таъмин мегарданд. Ояндаи наздик интиқоли барқ  ба деҳаҳои  Барчидев ва Япшорви водии Бартанг  низ ба роҳ монда мешавад.