Тоҷикистон дар COP31 таъсиси платформаи минтақавии инноватсияҳои «сабз»-ро дар Осиёи Марказӣ пешниҳод намуд

Ноябрь 21, 2026 09:12

ДУШАНБЕ, 21.11.2026 /АМИТ «Ховар»/. Дар доираи Конфронси 31-уми ҷонибҳои Конвенсияи қолабии Созмони Милали Муттаҳид оид ба тағйирёбии иқлим (COP31) дар Павилиони миллии Ҷумҳурии Қазоқистон таҳти унвони «Барномаи глобалии инноватсияҳои технологияҳои тоза: аз муваффақияти миллӣ то таъсири минтақавӣ ба иқлим» чорабинии мавзуӣ баргузор гардид.

Тавре ба АМИТ «Ховар» аз Кумитаи ҳифзи муҳити зисти назди Ҳукумати Ҷумҳурии Тоҷикистон хабар доданд, намояндаи Тоҷикистон дар ин чорабинӣ пешниҳод намуд, ки дар Осиёи Марказӣ «Платформаи минтақавии инноватсияҳои «сабз»» таъсис дода шуда, ҳамзамон давоми 12 моҳи оянда лоиҳаҳои намоишии фаромарзӣ дар самтҳои идоракунии партовҳо, самаранокии истифодаи захираҳои об ва мониторинги муҳити зист амалӣ карда шаванд.

Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода дар чорабинӣ аҳамияти рушди технологияҳои «сабз», ҷалби сармоягузорӣ ва дастгирии соҳибкорони навоварро дар ҳалли мушкилоти экологӣ ва иқлимӣ таъкид намуд.

Иттилоъ дода шуд, ки 21 октябри соли 2026 Кодекси нави экологии Тоҷикистон қабул гардид. Он заминаҳои ҳуқуқии ҳифзи муҳити зист ва истифодаи устувори захираҳои табииро тақвият бахшид. Инчунин лоиҳаи «Стратегияи идоракунии партовҳо то соли 2040» ба рушди низоми масъулияти васеи истеҳсолкунандагон, коркарди такрории партовҳо ва ташаккули инфрасохтори муосири идоракунии онҳо равона шудааст.

«Уҳдадории Тоҷикистон оид ба шинонидани 2 миллиард бех дарахт то соли 2040, инчунин мушкилоти обшавии беш аз 1000 пирях дар мамлакат ҳамчун омилҳои муҳими рушди технологияҳои инноватсионӣ арзёбӣ гардиданд. Дар ин замина истифодаи низомҳои обёрии дақиқ, мониторинги моҳворавии ҷангалҳо, зеҳни сунъӣ ва технологияҳои муосири арзёбии зиндамонии ниҳолҳо муҳим дониста мешавад», – афзуд Баҳодур Шерализода.

Ҳамзамон дар бахши идоракунии партовҳо низ ба имконияти рушди технологияҳои мониторинги партовҳои метан, коркарди дубораи захираҳо, батареяҳо ва таҷҳизоти электронӣ, инчунин ташаккули иқтисодиёти даврӣ таваҷҷуҳ зоҳир гардид. Тибқи пешбиниҳои Монитори миллии партовҳои электронӣ, ҳаҷми партовҳои электронии Тоҷикистон метавонад то соли 2050 ба 36 ҳазору 400 тонна дар як сол расад.

Тоҷикистон омода аст тавассути «Маркази минтақавии идоракунии партовҳо дар шаҳри Душанбе» барои татбиқи лоиҳаҳои озмоишӣ, ҷалби стартапҳо ва ширкатҳои технологӣ, инчунин мубодилаи таҷриба ва натиҷаҳои бадастомада бо кишварҳои минтақа мусоидат намояд.

Инчунин Тоҷикистон омодагии худро барои густариши ҳамкории минтақавӣ, дастгирии инноватсияҳои «сабз» ва татбиқи технологияҳои муосир барои таъмини рушди устувор ва муқовимат ба тағйирёбии иқлим изҳор намуд.

Ёдовар мешавем, ки аз 9 то 20 ноябр дар шаҳри Анталияи Туркия Конфронси 31-уми тарафҳои Конвенсияи қолабии Созмони Милали Муттаҳид оид ба тағйирёбии иқлим (COP31) баргузор гардид.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон

Ноябрь 21, 2026 09:12

Хабарҳои дигари ин бахш

Директори Агентии авиатсияи гражданӣ Ҳабибулло Назарзода дар Ассамблеяи 43-юми ИКАО дар шаҳри Монреали Канада иштирок намуд
Ҳамкории Тоҷикистон бо Фонди ОПЕК дар самти ҳифзи муҳити зист густариш меёбад
Дар Кӯлоб таҳти роҳбарии муовини Сарвазири Тоҷикистон Усмоналӣ Усмонзода ҷаласаи гурӯҳи корӣ доир шуд
Тоҷикистон ва ИМА таъсиси Шурои муштараки кориро баррасӣ намуданд
Дар Павилиони миллии Тоҷикистон дар COP31 чорабинии минтақавӣ баргузор гардид
ПАРЧАМИ ТОҶИКИСТОН — РАМЗИ ОЗОДӢ, ШАРАФ ВА ИФТИХОРИ МИЛЛАТ. Мулоҳизаҳо дар ин маврид
Дар Душанбе ҳамкории молиявии байналмилалӣ баррасӣ шуд
Байни сохторҳои мониторинги молиявии Тоҷикистону Русия ду санади ҳамкорӣ ба имзо расид
Дар доираи COP31 Тоҷикистон, Умон ва Непал роҳҳои ҳалли мушкилоти обу иқлимро баррасӣ карданд
Соли 2027 дар гузаргоҳи гумрукии ноҳияи Спитамен сохтмон ва насби таҷҳизоти сканкунии борҳо оғоз мегардад
Ҷаласаи 45-уми пленарии Гурӯҳи Авруосиё ба таъмини амнияти иқтисодию молиявӣ мусоидат менамояд
Ҳайати Тоҷикистон дар чорабинии сатҳи баланди вазирони Осиёи Марказӣ оид ба тағйирёбии иқлим иштирок намуд