ДАРАХТ БИНШОН! Дар ноҳияи Файзобод зиёда аз 3000 бех дарахт ва 2000 гулҳои ороишӣ шинонида шуданд

ФАЙЗОБОД, 06.04.2020 /АМИТ  «Ховар»/. Дар ноҳияи Файзобод то ин муддат зиёда аз 3000 бех дарахтони ороишӣ, аз қабили арча, можжевелник ва сосна шинонида шудаанд.  Дар ин бора аз шуъбаи муҳити зисти ноҳия ба хабарнигори АМИТ «Ховар» хабар доданд.

Ҳамзамон кормандони ин бахш шумораи зиёди дарахтони ороишӣ, махсусан арчаҳоро, ки давоми фасли сарди зимистон аз номусоидии боду ҳаво хушк гардида буданд, иваз намуда, ба ҷойи онҳо навъҳои гуногуни арча шинониданд.

Масъалаи муҳими дигар- ин гулшинонию гулзор сохтани шафати роҳҳову назди коргоҳҳо мебошад, ки дар ин самт ҳам корҳои чашмрас сурат мегиранд. То имрӯз зиёда  аз 2000 бех қаламчаҳои навъҳои гуногуни гулҳои ороишӣ шинонида шудаанд. Бар замми ин 1000 бех як навъи гули зебои садбарг дар ҳамаи ҷамоатҳои деҳоти ноҳия шинонида шуд, ки он навъи махсус буда, дар ду мавсими сол- баҳору   тирамоҳ мешукуфад.

Масъалаи дигари муҳиму айни замон аз ҳама зарурӣ он аст, ки имрӯз бояд эҳтиёҷоти ноҳияро бо таъмини дарахтони ороишию сояафкан аз ҳисоби қувваю захираҳои дохилии худ ба роҳ монд. Бо ин мақсад дар ҳудуди як гектар ниҳолхона бунёд намуда, дар он  баробари кӯчати ниҳолҳои ороишию сояафкан ниҳоли  мевадор ҳам ба роҳ монда шудааст. То имрӯз дар он зиёда аз 200 ниҳоли мевадиҳандаи арчаи навъи можжевелник, 3000 сосна ва ба ҳамин миқдор ниҳоли олуча парвариш меёбанд.

Ояндаи наздик шуъбаи муҳити зисти ноҳия ният дорад, ки ҳаҷму миқдори парвариш ва ба воя расонидани навъҳои гуногуни ниҳолҳои ороишию сояафкан ва гулҳои гуногуннавъро дар ниҳолхона зиёд намуда, эҳтиёҷоти мардуми ноҳияи Файзободро  аз ҳисоби ин ниҳолхона пурра таъмин намояд.