ФФТ: маросими қуръакашии дастаҳои Лигаи якуми Тоҷикистон баргузор шуд

ДУШАНБЕ, 10.04.2020. /АМИТ «Ховар»/. 9 апрел дар қароргоҳи Федератсияи футболи Тоҷикистон маросими қуръакашии дастаҳои Лигаи якуми Тоҷикистон баргузор шуд. Дар мавсими нави Лигаи якуми Тоҷикистон, ки аз ду марҳила иборат аст, 12 даста иштирок мекунанд. Дар ин бора мухбири АМИТ «Ховар» бо истинод ба Федератсияи футболи Тоҷикистон иттилоъ медиҳад.

Ба ин марҳила дастаҳои футболи  «Панҷшер»-и Ҷалолиддин Балхӣ, «Саройкамар»-и Панҷ, «Эсхата»-и Хуҷанд, «Исфара»-и Исфара, «Равшан»-и Кӯлоб, «Шоҳмансур»-и  Душанбе, «Барқчӣ»-и  Ҳисор, «Ваҳдат»-и  Ваҳдат, «Ҳулбук»-и  Восеъ, «Моҳир»-и Ёвон, «Равшан»-и  Зафаробад ва «Ҳосилот»-и  Фархор  дохил шуданд.

Тақвими бозиҳои Чемпионат тибқи рақамҳои таркибие, ки дастаҳо дар ҷараёни қуръакашӣ ба даст овардаанд, ташкил карда мешавад.

Дар даври аввали Лигаи якуми Тоҷикистон вохӯриҳои зерин доир мешаванд:

«Исфара» (Исфара) – «Равшан» (Зафаробад)

«Панҷшер» (Ҷалолиддин Балхӣ) – «Шоҳмансур» (Душанбе)

«Эсхата» (Хуҷанд) – «Ваҳдат» (Ваҳдат)

«Ҳосилот» (Фархор) – «Ҳулбук» (Восеъ)

«Равшан» (Кӯлоб) – «Саройкамар» (Панҷ)

«Барқчӣ» (Ҳисор) – «Моҳир» (Ёвон)

Ёдовар мешавем, ки Чемпионати Тоҷикистон байни дастаҳои Лигаи якум даҳаи дуюми моҳи апрел оғоз мешавад. Мутобиқи қоидаи муқарраргардида, дастаи ғолиб ва барандаи нишонҳои нуқраи Лигаи якуми Тоҷикистон-2020 ҳаққи иштирок дар мавсими ояндаи Лигаи олиро ба даст меоранд.