Турсунзода: Дар тамоми корхонаву ташкилоти шаҳр ситодҳои фаврӣ ва навбатдории шабонарӯзӣ ташкил гардидаанд

ТУРСУНЗОДА, 30.04.2020 /АМИТ «Ховар»/. Бо мақсади пурзӯр намудани чораҳои зиддиэпидемикӣ оид ба пешгирии бемории коронавирус ва вусъат бахшидан ба корҳои кишоварзӣ, иҷрои босифат ва саривақтии буҷет тибқи амри раиси шаҳри Турсунзода дар тамоми корхонаву ташкилоти шаҳр ситодҳои фаврӣ ва навбатдории шабонарӯзӣ ташкил гардидаанд. Бо ҷалби сохторҳои маҳаллии маорифу тандурустӣ, фарҳанг, кор бо занону ҷавонон, эҷодкорон, фаъолони ҲХДТ, мақомоти худфаъолияти ҷамъиятӣ ва ходимони дин гурӯҳҳои корӣ ва хатсайри корӣ таҳия гардидаанд. Ҳамзамон тавассути 5 нақлиёти бо баландгӯякҳо муҷаҳҳаз дар ҳар як маҳали аҳолинишин вобаста ба пешгирии бемории коронавирус, истифодаи оқилонаи заминҳои наздиҳавлигӣ, президентӣ ва хоҷагиҳои ёрирасону ҷамоавӣ бо усули гардиши хона ба хона корҳои фаҳмондадиҳӣ гузаронида шуда истодаанд.

Дар ин бора ба хабарнигори АМИТ «Ховар» котиби матбуоти раиси шаҳри Турсунзода Фирӯз Холиқов хабар дод.

Дар ҳудуди шаҳр шахсони масъул бо вазъи манзилҳои истиқоматӣ, бунгоҳҳои тиббӣ, марказҳои саломатӣ, беморхонаҳо ва муассисаҳои таълимӣ шинос шуда, дар ҳудуди шаҳр маъракаи безараргардонӣ пурзӯр карда шудааст. Бо ҷалби донишҷӯёни коллеҷу волонтёрони ҷавон аксияи «Худ ва аҳли оилаатро аз коронавирус ҳимоя намо» доир гардида, зимни он беш аз 34500 варақаҳои тавсиявӣ  тақсим гардиданд.

Дар ин раванд бо ташаббуси мақомоти иҷроияи ҳокимияти давлатӣ ва дастгирии соҳибкорону эҳсонкорон дар кӯчаву деҳа ва муассисаву корхонаҳо дастурҳои пешгирикунандаи бемории коронавирус насб гардида, ба оилаҳои ниёзманд маҳлули спиртӣ, хлор, собун, ниқобҳо ва дигар маводи зарурӣ тақсим гардиданд.

Тибқи иттилои мутахассисонии кумитаи замини шаҳри Турсунзода, бо мақсади таъмини амнияти озуқаворӣ, иҷрои саривақтии корҳои саҳроӣ, таъмини нақшаи кишт ситоди фаврии корӣ дар самти кишоварзӣ таъсис гардида, ҳамарӯза дар маҳал вобаста ба масъалаҳои мазкур корҳои фаҳмондадиҳӣ гузаронида мешаванд. Бо дарназардошти 60 % зиёд намудани кишти такрорӣ дар шаҳр 9378 га кишти такрорӣ, аз ҷумла, ғалладонагиҳо 5426 га, зироати техникӣ 20 га, кортошка 200 га, сабзавот 2380 га, полезиҳо 217 га ва хӯроки чорво 1135 га ба нақша гирифта шуда, барои иҷро ба хоҷагиҳо вобаста гардидааст.

Ҳамзамон дар шаҳр ситоди фаврӣ дар самти иқтисодӣ фаъолият менамояд, ки доир ба истифодаи сарфакоронаи маблағҳои буҷетӣ, роҳ надодан ба хароҷоти дуюмдараҷаву ғайримақсаднок, пардохти пурраи музди меҳнати кормандони соҳаҳои иҷтимоӣ, нафақа, ҷубронпулию кумакпулиҳо, беҳтаргардонии хизматрасониҳои тиббӣ ва танзими нархи маҳсулот дар бозорҳо чораҷӯӣ менамояд.