Тоҷикистон дар раддабандии нави ФИФА мавқеи худро дигар накард

ДУШАНБЕ, 10.04.2020. /АМИТ «Ховар»/. 9 апрел ФИФА рейтинги нави дастаҳои мунтахаби футболи сайёраро нашр  намуд. Дастаи футболи мунтахаби  Тоҷикистон дар ин раддабандӣ мавқеи худро дигар накард. Дар ин бора мухбири АМИТ «Ховар» Меҳрони  Қурбон бо истинод ба Федератсияи футболи Тоҷикистон иттилоъ медиҳад.

Ҳоло  дастаи мунтахаби  Тоҷикистон бо касби 1152 хол дар мақоми 121 қарор дорад. Дар робита ба таваққуф дар пасманзари пандемияи коронавирус мавқеи дастаҳо ва нишондиҳандаҳои холҳо дар мавқеи худ бетағйир монданд. Тағйироти бештарро дар шумораи холҳо дастаи мунтахаби Беларус, ки 3 балл ба даст овард  ва дастаи мунтахаби Ӯзбекистон, ки ҳамин миқдор холҳоро аз даст додаанд, ворид карданд.

Дастаи миллии Белгия бо касби 1762 хол садрнишини ҷадвал мебошад. Дар зинаи дуюм дастаи  мунтахаби   Франсия бо касби 1733 имтиёз ва дар ҷойи сеюм дастаи  мунтахаби  Бразилия бо касби 1712 хол ҷойгир шудаанд.

Мавқеи 10 дастаи мунтахаби   сайёра:

1. Белгия (1765 хол)
2. Франсия (1733)
3. Бразилия (1712)
4. Англия (1661)
5. Уругвай (1645)
6. Хорватия (1642)
7. Португалия (1639)
8. Испания (1636)
9. Аргентина (1623)
10. Колумбия (1622)
…..
121. Тоҷикистон (1152)