Ҷаласаи Ситоди вилоятӣ оид ба пешгирӣ аз паҳншавии Covid-19 дар вилояти Суғд таҳти роҳбарии муовини Сарвазир сурат гирифт

ДУШАНБЕ, 08.05.2020  /АМИТ «Ховар»/. Дар меҳмонхонаи «Суғдиён»-и шаҳри Хуҷанд таҳти роҳбарии Муовини Сарвазири Ҷумҳурии Тоҷикистон Ширин Исматуллолода ҷаласаи Ситоди вилоятӣ оид ба пешгирӣ аз паҳншавии бемории коронавирус — Covid-19 дар Суғд баргузор гардид, хабар медиҳад хабарнигори минтақавии АМИТ «Ховар» Абдуаҳад Дадабоев.

Ӯ илова намуд, ки дар рафти ҷаласаи ситод аз ҷониби масъулини Раёсатии тандурустии вилоят маълумоти муфассал оид ба қабул, муолиҷа ва вазъи беморон пешниҳод шуд. Иттилоъ дода шуд, ки алҳол тамоми имконият ва иқтидорҳо барои пешгирӣ ва муолиҷаи ин беморӣ сафарбар карда шудаанд. Духтурон бо корҷома ва дигар маводҳои беҳдоштӣ таъмин гардида, дар беморхонаҳо се маҳал хӯроки гарм ташкил шудааст. Тамоми дорухонаҳо бо доруҳои зарурӣ таъмин ва имрӯз аз ҷониби соҳибкорон боз якчанд номгуй дорувориҳо ба ҳудуди вилояти Суғд ворид гардиданд. Дармонгоҳҳо низ шабонарузӣ фаъоланд.

Муовини Сарвазири мамлакат Ширин Исматуллолода таваҷҷуҳи масъулинро баҳри тақвияти бештари корҳо дар самти мубориза алайҳи паҳншавии бемории каронавирус — Covid-19 дар вилояти Суғд ҷалб намуда, талаб кард, ки ҷиҳати пешниҳоди муаммову мушкилоти ҷойдошта фаъол бошанд ва дар якҷоягӣ барои рафъи он чораҳо андешанд.

Ширин Исматуллозода ба масъулини дахлдор ҷиҳати ҷилавгирӣ аз қиматшавии маводи доруворӣ дастуру супоришҳо дода, ҳамзамон баҳри ворид намудани доруворӣ аз хориҷи кишвар бо ҷалби соҳибкорони дар ин самт фаъол буда, машварат дод.

Таъкид гардид, ки имрӯз 15 ширкати воридкунандаи маводи доруворӣ дар вилоят фаъол буда, аз имтиёзу дастгириҳои доимии Давлату Ҳукумат бархӯрдоранд. Вобаста ба вазъи имрӯза эшон ҷиҳати фаровонсозии маводи доруворӣ ва паст кардани нархи он саҳмгузорӣ намоянд.