Дар ноҳияи Ҷалолиддини Балхӣ варзишгоҳ бо 15 ҳазор ҷои нишаст бунёд мешавад

ДУШАНБЕ, 08.06.2020 /АМИТ «Ховар»/.  Дар ҷамоати Холеварди ноҳияи Ҷалолиддини Балхӣ дар масоҳати 11 га  майдони варзишии дорои  15 ҳазор ҷои нишаст сохта мешавад. Дар ин бора аз мақомоти иҷроияи ҳокимияти давлатии вилояти Хатлон ба АМИТ «Ховар» хабар доданд.

Тибқи  иттилои манбаъ, варзишгоҳ аз ҷумлаи  он иншоотест, ки дар доираи сохтмони маҷмааи варзишӣ соли 2021 дар арафаи Иди байналмилалии Наврӯз мавриди баҳрабардорӣ қарор мегирад.  Пудратчии сохтмони мазкур  ҶДММ «Ширкати холдингии  Исмоили Сомонӣ» мебошад. Барои сохтмони ин маҷмааи варзишӣ,  ки  36 миллион сомонӣ арзиш  дорад, 25 га замин ҷудо карда шудааст.

Ҳамчунин дар мақомоти  иҷроияи Ҳокимияти давлатӣ  чунин изҳор намуданд: «Дар  паҳлӯи он майдони Парчами давлатӣ ва майдони нишони давлатӣ  низ бунёд мешаванд».

Тибқи лоиҳа, дар атрофи маҷмааи варзишӣ  як меҳмонхона, маркази савдо ва бинои истиқоматӣ сохта мешванд. Дар шафати он як  мактаб — литсейи президентӣ бо 2 хобгоҳ барои донишҷӯён ва омӯзгорон ба маблағи 23 миллион сомонӣ ва муассисаи  томактабии  сеошёна барои 330 кӯдак бо арзиши 13 миллион сомонӣ  бунёд мегарданд.