ИМРӮЗ ОЛИМПИАДАИ УМУМИҶАҲОНӢ ОИД БА ШОҲМОТ — 2020 ОҒОЗ МЕЁБАД. Бори нахуст дар таърих он дар шакли онлайн аз 22 июл то 30 август доир хоҳад шуд

ДУШАНБЕ, 22.07.2020 /АМИТ «Ховар»/. Федератсияи байналмилалии шоҳмот (ФИДЕ) баргузории Олимпиадаи умумиҷаҳонии шоҳмотро, ки нахустин бор дар таърих дар шакли онлайн аз 22 июл то 30 августи соли 2020 баргузор хоҳад шуд, эълом намуд. Марҳилаи пешакии онлайн — олимпиадаи умумиҷаҳонии шоҳмот имрӯз шурӯъ мешавад, хабар медиҳад АМИТ Ховар.

Онлайн — Олимпиадаи умумиҷаҳонии шоҳмот – ин мусобиқаи дастаҳои миллӣ мебошад ва тамоми федератсияҳои миллии аъзои ФИДЕ дар он метавонанд иштирок намоянд.

Ҳар як даста аз шаш бозингар дар шакли омехта иборат хоҳад буд, ҳадди аққал ба даста бояд се зан/духтар ва ду бозингари ҷавон шомил бошанд. Таркиби ҳар даста бояд чунин бошад:

— ҳадди ақал 1 бозингари то 20-сола (соли таваллуди 2000 ва баъд аз он);

— ҳадди ақал 2 бозингари зан;

— на камтар аз 1 духтари то 20-сола (соли таваллуд 2000 ё баъд аз он).

Дастаҳо метавонанд иловатан шаш тан бозингари эҳтиётӣ ва як сардори даста дошта бошанд. Назорати вақт: 15 дақиқа + 5 сония барои ҳар як гардиши анҷомшуда.

Чорабинӣ аз ду марҳилаи асосӣ иборат хоҳад буд: бозиҳо дар “Дивизионҳо» ва “Плей-офф”.

Дар мусобиқот 163 даста, аз ҷумла қавитарин дастаҳои ҷаҳон — Россия, Чин ва ИМА ширкат хоҳанд кард.

Аксарияти дастаҳо бо ҳайатҳои беҳтарини худ баромад мекунанд. Қаҳрамони ҷаҳон Магнус Карлсени норвегиягӣ, ки дар давраи пандемия дар чандин мусобиқоти онлайн ғолиб омадааст, дар ин мусобиқот иштирок нахоҳад кард.

Тавре дирӯз АМИТ «Ховар» хабар дода буд, рӯзи сешанбе дар шаҳри Душанбе дар Рӯзи байналмилалии шоҳмот, дувумин Мусобиқаи ҷумҳуриявӣ оид ба шоҳмот барои Ҷоми Президенти Тоҷикистон оғоз ёфт.