«МО, ҶАВОНОН, ИН ВАТАНРО САБЗУ ХУРРАМ МЕКУНЕМ!» Таҳти ин унвон Аксияи ҷумҳуриявии тозагӣ роҳандозӣ шуд

ДУШАНБЕ, 25.07.2020 /АМИТ «Ховар»/. Бахшида ба 29-умин солгарди Истиқлолияти давлатии Ҷумҳурии Тоҷикистон имрӯз дар мамлакат аз ҷониби сохторҳои маҳаллии Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аксияи ҷумҳуриявии тозагӣ таҳти унвони «Мо, ҷавонон ин Ватанро сабзу хуррам мекунем!» роҳандозӣ шудааст.

Тавре аз Кумитаи кор бо ҷавонон ва варзиши назди Ҳукумати ҷумҳурӣ ба АМИТ «Ховар» иттилоъ доданд, дар аксияи мазкур иштироки доираи васеи ҷавонону наврасон ва сокинони маҳаллӣ дар назар дошта шудааст.

Аксияи «Мо, ҷавонон, ин Ватанро сабзу хуррам мекунем!» дар доираи нақшаи чорабиниҳои Ташкилоти ҷамъиятии «Пайравони Пешвои миллат» баргузор  шуда, ҳадаф аз он сазовор истиқбол гирифтани ҷашни 30-солагии Истиқлолияти давлатии Ҷумҳурии Тоҷикистон ва дар рӯҳияи меҳнатдӯстиву ватанпарастӣ тарбия намудани насли ҷавони мамлакат мебошад.

Аксияи тозагии мазкур дар 68 шаҳру ноҳияҳои ҷумҳурӣ доир шуда, ҷавонон дар пайравӣ аз сиёсати созандаву бунёдкоронаи Президенти мамлакат муҳтарам Эмомалӣ Раҳмон дар рушду нумуи Тоҷикистони соҳибистиқлол саҳм мегузоранд.