Президенти Филиппин касонеро, ки аз пӯшидани ниқобҳои зидди коронавирус саркашӣ мекунанд, таҳдиди ҳабс намуд

ДУШАНБЕ, 22.07.2020 /АМИТ «Ховар»/. Президенти Филиппин Родриго Дутерте касонеро, ки аз пӯшидани ниқобҳои зидди коронавирус саркашӣ мекунанд, таҳдиди ҳабс намуд, хабар медиҳад АМИТ «Ховар» бо истинод ба агентии Reuters.

«Мо дар мавриди ба ҳабс гирифтани касоне, ки дар шароити пандемия ниқоб намепӯшанд ва фосилаи амнро риоя намекунанд, шак надорем. Ин ҷинояти ҷиддӣ аст. Бигзор ҳабси онҳо барои дигарон сабақи хуби ибрат шавад ”, — гуфт роҳбари давлати Филиппин.

Ҳафтаи гузашта ҳукуматдорон эълом намуданд, ки дар сурати зарурат онҳо иҷборан мубталоёни шакли сабуки пневмонияи вобаста ба коронавирусро аз хонаҳояшон ба беморхонаҳо интиқол медиҳанд, сарфи назар аз он ки онҳоро дар нақзи ҳуқуқи инсон гунаҳкор хоҳанд кард. Мансабдорон зарурати андешидани тадбирҳои қатъиро ба афзоиши якбораи шумораи сироятёфтагон ва фавтидагон аз уфунат пас аз он ки моҳи июн дар Филиппин реҷаи карантин суст карда шуд, рабт доданд.

Дар айни замон аз рӯи шумораи ҷонбохтагон аз пандемия Филиппин дар Осиёи Ҷанубу Шарқӣ, баъд аз Индонезия, ҷои дуюмро ишғол менамояд. Аз моҳи июн теъдоди филиппиниҳои сироятёфта чор маротиба зиёд шуда, ба 68,898 тан расид. Шумораи ҷонбохтагон моҳи гузашта ду баробар афзоиш ёфта, то 1835 тан расидааст.

АКС: coronavirusnewslive.com