Шерхон Салимзода: «Қаламрави Тоҷикистон барои ҳамлу нақли мухаддирот камтар истифода мешавад»

ДУШАНБЕ, 16.07.2020 /АМИТ «Ховар»/. «Солҳои охир қаламрави Тоҷикистон ҷиҳати ҳамлу нақли маводи мухаддир камтар истифода мешавад. Тавассути «Масири шимолӣ» аз 8 то 10 фоизи миқдори умумии маводи мухаддир интиқол дода мешавад», — гуфт директори Агентии назорати маводи нашъаовари назди Президенти Ҷумҳурии Тоҷикистон Шерхон Салимзода имрӯз зимни нишасти матбуотӣ.

Ба қавли директори Агентӣ, сабаби асосии ин коҳишёбӣ чораҳои андешидаи Ҳукумати Тоҷикистон ҷиҳати таҳкими сарҳади давлатӣ байни Тоҷикистону Афғонистон, пурзӯр намудани мубориза алайҳи қочоқ ва муомилоти ғайриқонунии маводи мухаддир аз тарафи мақомоти ҳифзи ҳуқуқ ва сохторҳои амниятии мамлакат мебошанд.

Мавсуф инчунин ёдовар шуд, ки солҳои қаблӣ аз тариқи ин масир тақрибан 25-40% маводи мухаддири дар Афғонистон истеҳсолшуда интиқол дода мешуд. Сарвари АНМН Тоҷикистон иброз намуд, ки дар кишварҳои Осиёи Марказӣ ва инчунин дар Россия низ ҳаҷми мусодираи маводи мухаддир 5 маротиба коҳиш ёфтааст, теъдоди шаҳрвандони ба иттиҳоми қочоқи маводи мухаддир боздоштшудаи Тоҷикистон дар хориҷи ҷумҳурӣ 2,5 маротиба кам шудааст.

Илова бар ин, дар ҳамин давра дар қаламрави Афғонистон ҳолатҳои мусодираи прекурсорҳо (маводи кимиёвӣ, ки дар раванди таҳияи маводи мухаддир, аз ҷумла героин истифода мешавад) сабт нашудаанд.

Дар қаламрави Тоҷикистон низ ҳолатҳои парвариши растаниҳои нашъадор ба назар намерасанд (ба истиснои ягон — ягон ҳолати парвариши миқдори ками онҳо барои истеъмоли шахсӣ).

Тибқи маълумоти ин сохтор, дар Афғонистон дар 163 ҳазор гектар замин кӯкнор кишт шудааст ва соли равон интизор меравад, ки 6 400 тонна афюн ҷамъоварӣ хоҳад шуд.

Шерхон Салимзода таъкид кард, ки дар солҳои охир талабот ба героин каму беш коҳиш ёфтааст, истеъмолкунандагони мухаддирот аз маводи нашъаовари синтетикӣ, хусусан навъи ҷадиди он «кристалл», ки ба таври қочоқ аз кишварҳои Аврупо, аз ҷумла — Латвия ба Тоҷикистон интиқол дода мешавад, истифода менамоянд. Аммо вақтҳои охир маводи нашъаовари синтетикӣ аз Ҷумҳурии Исломии Афғонистон низ ба ҷумҳурӣ ворид мешавад.