Чемпионати Осиё оид ба бокс бо сабаби бемории COVID-19 ба соли 2021 гузаронида шуд

ДУШАНБЕ, 23.08.2020. /АМИТ «Ховар»/. Чемпионати Осиё оид ба бокс, ки бояд моҳҳои ноябр-декабр дар  Ҷумҳурии Ҳиндустон баргузор мешуд, бо сабаби пандемияи COVID-19 ба соли оянда гузаронида шуд. Дар ин бора намояндаи расмии Кумитаи миллии олимпии Тоҷикистон Умаралӣ Сафаралӣ ба шореҳи варзиши АМИТ «Ховар» Меҳрони Қурбон хабар дод.

Дар ин бора ҷаласаи кумитаи иҷроияи Конфедератсияи бокси Осиё, ки тариқи фосилавӣ доир гашт, қарор қабул намуд.

Ҷумҳурии Ҳиндустон мизбони мусобиқа боқӣ мемонад. Санаи дақиқи баргузор шудани мусобиқа дар ҷаласаи навбатии кумитаи иҷроияи Конфедератсияи бокси Осиё моҳи ноябри соли 2020 муайян мегардад. «Конфедератсияи бокси Осиё тасмим гирифт, ки имсол имкон дорад фақат як мусобиқаро моҳи ноябр дар Чин доир намояд ва дар он беҳтарин муштзанҳо иштирок хоҳанд кард. Вале ин танҳо дар нақша аст, ҳоло баргузории он аниқ нест», — гуфтааст Коули.

Муштзани маъруфи тоҷик Баҳодур Усмонов  соли гузашта дар Чемпионати бокси Осиё дар шаҳри Бангкоки Тайланд ба унвони чемпионӣ даст ёфта, бо медали тилло сарфароз гашт. Баҳодур дар рақобатҳо дар вазни то 64 кило баъди се пирӯзӣ ба финал баромад. Ӯ дар қувваозмоии ниҳоӣ бар Обада Ал-Касбе аз Урдун дастболо шуд.

Зимнан, Баҳодур Усмонов дар таърихи бокси тоҷик чорумин муштзанест, ки ба гирифтани унвони чемпиони Осиё мушарраф шудааст.

Хотиррасон мешавем, ки ду муштзани шинотаи тоҷик — Баҳодур Усмонов дар вазни то 63 кило ва Шаббос Неъматуллоев дар вазни то 81 кило – дар мусобиқаи интихобии олимпӣ дар минтақаи Осиё/Уқёнус, ки моҳи марти имсол дар шаҳри Аммони Урдун доир гардид, ба Бозиҳои XXXII тобистонаи олимпӣ дар Токио роҳхат гирифтанд.

Олимпиадаи Токио-2020 ба далели пандемияи коронавирус як сол ба таъхир афтода, ба соли 2021 гузаронида мешавад.