COVID-19: Дар Вазорати тандурустӣ ва ҳифзи иҷтимоӣ доир ба вазъи ин беморӣ дар Тоҷикистон машварати онлайнӣ доир шуд

ДУШАНБЕ, 10.08.2020 /АМИТ «Ховар»/. Имрӯз дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҷиҳати таҳлили вазъи бемории  COVID-19 дар мамлакат ва андешидани тадбирҳои қатъӣ машварати онлайнӣ баргузор гардид. Дар он  Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода, муовинони вазир  Ғафур Муҳсинзода, Самариддини Ализода, сардорони раёсатҳои тандурустии вилоятҳо ва роҳбарони муассисаҳои тандурустии шаҳру ноҳияҳои мамлакат иштирок намуданд.

Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода таваҷҷуҳи ҳамагонро  ба масъалаҳои андешидани тадбирҳои иловагӣ ҷиҳати пешгирӣ аз мавҷи дуюми бемории коронавируси нави COVID-19 равона намуд. Ҳамзамон  иброз дошт, ки  корҳои фаҳмондадиҳӣ дар байни аҳолӣ, риояи қоидаҳои пешгирии бемории мазкур ва  назорати беморони амбулаторӣ пурзӯр гардида,  беморон бо маводи доруворӣ таъмин карда шаванд.

Дар фарҷом аз ҷониби Вазири тандурустӣ ва ҳифзи иҷтимоии аҳолии мамлакат ҷиҳати боз ҳам беҳтар намудани хизматрасонии тиббӣ ва андешидани тадбирҳои иловагӣ ҷиҳати пешгирӣ ва табобати бемории  COVID-19 дастуру супоришҳои мушаххас дода шуд.