Дар Ховалинг бо истифода аз маводи мадҳушкунанда ҷинояти ғоратгарӣ содир шуд

ДУШАНБЕ, 01.08.2020 /АМИТ «Ховар»/. Ба шуъбаи Вазорати корҳои дохилии ҷумҳурӣ дар ноҳияи Ховалинг марди 37-солаи сокини Ҷамоати деҳоти Шугнови ноҳияи мазкур бо ариза муроҷиат намудааст, ки 27 июли соли 2020, тахминан соатҳои 03 ба 04-00 субҳ шахсони номаълум бо роҳи ошкоро ба хонаи истиқоматиаш даромада, нисбат ба ҳамсараш, зани 36-сола, зӯроварӣ нишон дода, ҳангоми доду фиғон бардоштани ҳамсараш барои беҳуш намудани номбурда маводи мадҳушкунандаи бо худ доштаро истифода бурда, як адад телефони мобилии тамғаи “Самсунг А-3”-ро тасарруф намуда, аз ҷойи ҳодиса ғайб задаанд.

Тавре ВКД хабар медиҳад, ҳангоми гузаронидани чорабиниҳои фаврӣ-ҷустуҷӯӣ аз ҷониби кормандони милитсия мардони 26, 27, 28-солаи сокинони ноҳияи Панҷ, ки якеашон пеш бо моддаи 244-и Кодекси ҷиноятии Ҷумҳурии Тоҷикистон суд шудааст, ҳамчун гумонбар дар содир намудани ҷинояти ғоратгарӣ дастгир карда шуданд.

Далели шайъӣ-  як адад маводи мадҳушкунанда (амиаку розчин) гирифта шуда, тафтиш идома дорад.