Ғолибони озмунҳои «Оилаи беҳтарин», «Маҳаллаи беҳтарин» ва «Кӯчаи беҳтарин» дар шаҳри Душанбе муайян шуданд

Сентябрь 11, 2020 09:23

 ДУШАНБЕ, 11.09.2020 /АМИТ «Ховар»/. Озмунҳои шаҳрии «Оилаи беҳтарин», «Маҳаллаи беҳтарин» ва «Кӯчаи беҳтарин» дар шаҳри Душанбе ҷамъбаст гардиданд. Зимни як ҳамоиши тантанавӣ дар мақомоти иҷроияи ҳокимияти давлатии шаҳри Душанбе довталабоне, ки   дар озмунҳои мазкур    сазовори ҷойҳои ифтихорӣ гардиданд, қадрдонӣ шуданд. Дар ин бора аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд.

Тибқи баҳогузории ҳайати ҳакамони озмун, дар номинатсияи «Оилаи беҳтарин» оилаи Заррагул Қурбонова, истиқоматкунандаи кӯчаи Қурбон Раҳимови ноҳияи Исмоили Сомонӣ  мақоми аввалро соҳиб шуда, оилаи Фирӯза Ҳиматова, сокини кӯчаи Гастеллои ноҳияи Шоҳмансур ба  ҷойи дуюм ва оилаи Абдуғаффор Ғаниев аз кӯчаи Сайидои Насафии ноҳияи Фирдавсӣ ба гирифтани  ҷойи сеюм ноил гардиданд.

Дар номинатсияи «Маҳаллаи беҳтарин» ҷойи аввал ба маҳаллаи «Шоҳмансур-1»-и ноҳияи Шоҳмансур, ҷойи дуюм ба маҳаллаи  «Чортут»-и ноҳияи Сино ва ҷойи сеюм ба маҳаллаи «Шафақ»-и ноҳияи Исмоили Сомонӣ муносиб дониста шуд.

Дар номинатсияи «Кӯчаи беҳтарин»  ҷойи якум  ба хиёбони Ҳофизи Шерозии ноҳияи Исмоили Сомонӣ, мақоми  дуюм ба кӯчаи Аҳмади Дониши ноҳияи Шоҳмансур ва зинаи сеюм ба кӯчаи Неъмат Қарабоеви ноҳияи Фирдавсӣ  сазовор дониста шуд.

Ғолибон дар  ҷамъомади  тантанавӣ бо мукофотҳои пулӣ ва «Диплом»-и мақомоти иҷроияи ҳокимияти давлатии шаҳри Душанбе сарфароз гардиданд.

Ёдовар мешавем, ки  бо ташаббуси мақомоти иҷроияи ҳокимияти давлатии шаҳри Душанбе бахшида ба  ҷашни 30-солагии Истиқлоли давлатии Ҷумҳурии Тоҷикистон  дар пойтахт   имсол ва соли 2021  ҷиҳати муайян намудани беҳтарин оила, маҳалла ва кӯча озмунҳои шаҳрии «Оилаи беҳтарин», «Маҳаллаи беҳтарин» ва «Кӯчаи беҳтарин» гузаронида мешаванд. Дар ин бора қарори Раиси шаҳри Душанбе Рустами Эмомалӣ  аз 13 марти соли 2020 ба имзо расидааст.

Бо қарори Раиси шаҳр аз ҳисоби маблағҳои барои иҷрои вазифаҳои пойтахти Ҷумҳурии Тоҷикистон пешбинишуда ҷиҳати мукофотонидани ғолибони ҳар як озмун —  «Оилаи беҳтарин», «Маҳаллаи беҳтарин» ва «Кӯчаи беҳтарин»  дувоздаҳ ҳазор сомонӣ (барои ҷойи якум — 6000, ҷойи дуюм — 4000 ва ҷойи сеюм — 2000 сомонӣ) ҷудо  гардидааст.

Сентябрь 11, 2020 09:23

Хабарҳои дигари ин бахш

Деҳқонони Хатлон сокинони шаҳри Душанберо бо маҳсулоти тару тозаи кишоварзӣ таъмин менамоянд
23 сентябр Иҷлосияи сеюми Маҷлиси вакилони халқи шаҳри Душанбе, даъвати шашум баргузор мегардад
МАҚСАД – ФАРОВОНӢ, ДАСТРАСӢ ВА АРЗОНИИ МОЛУ МАҲСУЛОТ ДАР БОЗОРҲО. Байни мақомоти иҷроияи ҳокимияти давлатии шаҳри Душанбе ва хоҷагиҳои деҳқонии шаҳри Турсунзода шартномаи дутарафаи ҳамкорӣ баста шуд
Раиси шаҳри Душанбе Рустами Эмомалӣ барои ҳавасмандгардонии ниёзмандон 4 913 300 сомонӣ маблағ ҷудо намуд
Дар Душанбе Нақшаи чорабиниҳо оид ба ниҳолшинонию сабзкорӣ тасдиқ гардид
«Зебоӣ, доноӣ ва тавоноӣ аз варзиш аст!» Дар Душанбе Фестивали дӯстии ҷавонону варзишгарон оғоз гардид
Ба тарифҳои ҳамлу нақли мусофир дар шабакаи хатсайрҳои Душанбе тағйиру иловаҳо ворид гардиданд
Дар Душанбе машварати августии омӯзгорон доир гардид
Дар Душанбе хатсайри троллейбусии №12 барқарор гардид
Дар Душанбе Маркази хизматрасонии «Mersedes –Benz» ифтитоҳ гардид
Ҳаракати нақлиёт дар роҳи мошингарди хиёбони Рӯдакӣ – маҳаллаи Нодираи ноҳияи Исмоили Сомонӣ муваққатан қатъ мегардад
Мутасаддиён барои фаъолияти намунавӣ дар нигоҳубини дарахтони аз хориҷа воридшуда ҳавасманд мегарданд