Ғолибони Мусобиқаи ҷумҳуриявӣ оид ба дзюдо байни ҷавонон дар ноҳияи Ҷаббор Расулов муайян шуданд

ДУШАНБЕ, 29.10.2020 /АМИТ «Ховар»/.  Дар ноҳияи Ҷаббор Расулови вилояти Суғд Мусобиқаи ҷумҳуривӣ оид ба дзюдо  байни ҷавонони соли таваллудашон 2000-2002 баргузор шуд. Дар мусобиқаи мазкур 135 нафар варзишгарон дар ҳайати нуҳ даста – Душанбе-1, Душанбе-2, Хатлон-1, Хатлон-2, Суғд-1, Суғд-2, Вилояти Мухтори Кӯҳистони Бадахшон, шаҳру ноҳияҳои тобеи марказ ва минтақаи Рашт ширкат карда, аз рӯи 7 дараҷаи вазнӣ миёни ҳам рақобат намуданд.

Дар ин бора  аз  Федератсияи  дзюдои  Тоҷикистон ба шореҳи  варзиши АМИТ «Ховар» хабар доданд.

Дар шаш вазн намояндагони шаҳри  Душанбе, дар як вазн варзишгари ШНТМ ғалаба карданд. Дар вазни -60 кг Шаҳбоз Саидаброров пас аз мағлуб намудани Фирӯз Мелибойзода соҳиби медали тилло шуд.

Дар зинаи сеюм варзишгарони шаҳру ноҳияҳои тобеи марказ Сарвар Абдушукуров ва Аҳмад Аюбов қарор гирифтанд.

Эмомалии Нуралӣ дар финали вазни- 66 кг Абубакр Шеровро мағлуб намуда, медали тиллоро  соҳиб шуд. Медалҳои биринҷӣ насиби Фарух Ҳалимов ва Худобахш Сулаймонов шуданд. Дар финали вазни -73 кг боз ду варзишгари Душанбе бо ҳам қувва  санҷиданд ва Муҳаммад Саъдуллоев тавонист Қурбоналӣ Бозоровро мағлуб намояд.  Умар Расулов аз ШНТМ дар вазни  -81 кг пас аз пирӯзӣ бар Аминҷон Сафаров аз шаҳри Душанбе ғолиб шуд.

Дар финали вазни 90 кг боз ҳам варзишгарони шаҳри Душанбе ғолиб омаданд. Раҳаматуло Мирзоев тавонист Фаридун Холиқовро мағлуб намуда, ҷои аввалро ишғол кунад. Дар вазни -100кг Абубакри Акобир Фарзин Ҳусайнов аз вилояти Суғдро шикаст дода, ғолиб шуд. Ниҳоят дар вазни +100 кг Бобоҷон Бобоев Иброҳим Элмуродовро мағлуб намуда, соҳиби медали тилло гардид.