«Омад хуҷаста Меҳргон, ҷашни бузурги хусравон…». Пагоҳ дар шаҳри Душанбе Иди Меҳргон таҷлил мегардад

ДУШАНБЕ, 17.10.2020 /АМИТ «Ховар»/. Пагоҳ, 18 октябр дар Боғи фарҳангию фароғатии ба номи Абулқосим Фирдавсии пойтахт  бо ташаббуси Вазорати кишоварзии Ҷумҳурии Тоҷикистон ва мақомоти иҷроияи ҳокимияти давлатӣ дар  шаҳри Душанбе Иди Меҳргон ва Фестивал-намоиши шолӣ ва биринҷ бо шукӯҳу шаҳомати хосса таҷлил мегардад.

Дар ин рӯз деҳқонони мамлакат аз  тамоми гӯшаву канори ҷумҳурӣ дастранҷи худ – маҳсулоти тару тозаи  кишоварзӣ, аз қабили навъҳои гуногуни зироат, сабзавот ва меваҷотро  бо нархҳои дастрас пешниҳоди иштирокдорон менамоянд. Дар ин макон ҳамчунин аз ҷониби беҳтарин кадбонуҳои мамлакат   хӯрокҳои миллӣ  омода гардида, ҳунармандони  мардумӣ маҳсули дасти хешро манзури сокинон ва меҳмонони пойтахт мегардонанд. Зеро Меҳргон ҷашнест, ки покизагию фаровонҳосилӣ, ризқу рўзии мардум, хони пурнозу неъмат, қаноатмандию нишот ҳамроҳ меоварад ва таҷлили пуршукўҳи он башорати рӯзгори босаодат аст.

Барномаҳои ҷашнӣ дар Боғи фарҳангию фароғатии ба номи Абулқосим Фирдавсии пойтахт аз соати 09:00 оғоз меёбанд.

Вазорати кишоварзии мамлакат зимни таҷлили Иди Меҳргон ва Фестивал-намоиши шолӣ ва биринҷ як гурӯҳ кишоварзони фаъоли  мамлакатро, ки соли равон  дар соҳа нишондиҳандаҳои беҳтарин ба даст овардаанд,  бо  туҳфаҳои молию пулӣ ва Диплому Ифтихорнома ҳавасманд мегардонад.

Дар ин намоиш  намояндагони Дастгоҳи иҷроияи Президенти Ҷумҳурии Тоҷикистон, вазорату идораҳо, Донишкадаи аграрии Тоҷикистон ва фаъолони вилоятҳои Хатлон, Бадахшон, Суғд ва ноҳияҳои тобеи ҷумҳурӣ иштирок менамоянд.

Тибқи Қарори Ҳукумати Ҷумҳурии Тоҷикистон аз 5 августи соли 2009  дар ҷумҳурӣ Иди Меҳргон чун иди миллӣ  таҷлил карда мешавад.

Меҳргон ҳамасола дар саросари ҷумҳурӣ таҷлил гардида, мисли  ҷашнҳои таърихии  Наврӯз,  Сада,  Тиргон ва ғайраҳо аз қадимтарин идҳои миллии мардуми ориёинажод  маҳсуб мешавад. Президенти мамлакат муҳтарам Эмомалӣ Раҳмон соли 2011 зимни таҷлили ҷашни 80-солагии таъсиси Донишгоҳи аграрии Тоҷикистон гуфта буданд: «Меҳргон ба монанди Наврӯз таҷассуми суннатҳои неки инсонист, ки файзу баракати хони пурнеъмати кишоварзонро инъикос менамояд. Бинобар ин, зарур аст, ки он ҳар сол бо шукӯҳу шаҳомати хосса таҷлил карда шавад. Аз ин хотир, анъанаву расму ойини хос ва фарҳанги ғании мардуми тоҷик, ки аз қадимулайём бо замин сару кор доштанд ва соҳиби маданияти баланди заминдорӣ буданд, то имрӯз боқӣ монда, ҳамчун ҷузъи таркибии тамаддуни умумибашарӣ барои инсоният хизмат менамояд».

Меҳргон воқеан ҳам ҷашни  мардумӣ буда, маҳбубияти он  аз замонҳои бостон то рўзгори мо расидааст.

Тавре Манучеҳри Домғонӣ дар васфи Меҳргон сурудааст:

Омад хуҷаста Меҳргон, ҷашни бузурги хусравон,
Пурфайз бод хони шумо аз нуру нору арғавон…