ТАВСИЯИ МУТАХАССИС: Моҳи октябрро кишоварзон бояд самаранок истифода баранд

ДУШАНБЕ, 14.10.2020 /АМИТ «Ховар»/. Бинобар тавсияи олимони соҳаи кишоварзии мамлакат, аз аввали моҳи октябр шабона ҳарорати ҳаво паст ва рӯзона баланд гардида истодааст, ки ин барои нашъу намои ҳосили дар саҳро буда мусоидат мекунад. Ин гуна боду ҳаво имкон медиҳад, ки то охири мавсим ҳосили дар пахтазор буда пурра шукуфта ва ҷамъоварӣ гардад. Пахтакорони мамлакатро мебояд, ки аз ин гуна рӯзҳо ва боду ҳавои мусоид самаранок истода баранд.

Имсол кишоварзони мамлакат дар майдони 186 ҳазору 156 гектар кишти пунбадона гузарониданд. Аз аввали мавсим то 10 октябр дар  вилояти Хатлон 172 ҳазору 394 тонна  ё 62,0 фоиз, дар Суғд 63 ҳазору 147 тонна ё 48,8 фоиз ва дар навоҳии тобеи марказ 3116 тонна пахта, ки 48,3 фоизи дурнаморо ташкил медиҳад,  ҷамъоварӣ шудааст.

Тибқи маълумоти Раёсати тухмипарварӣ ва дастовардҳои селексионии Вазорати кишоварзии Ҷумҳурии Тоҷикистон,  дар ҷумҳурӣ аз аввали мавсим то 10 октябр 238 ҳазору 657 тонна пахта ҷамъоварӣ шудааст, ки 56,7 фоизро ташкил медиҳад.

Тавре аз Агентии обуҳавошиносӣ ба АМИТ «Ховар» хабар доданд, даҳаи дуюм ва сеюми моҳи  октябр дар вилояти Хатлон ва водиҳои ноҳияҳои тобеи ҷумҳурӣ эҳтимоли пастшавии ҳарорати ҳаво  мавҷуд буда, боронҳои кӯтоҳмуддат, вазиши шамол ва чангу ғубор дар назар аст. Шабона ҳаво аз 9+14 то 6+11 дараҷа ва рӯзона аз 19+24 то 24+29 дараҷа гарм мешавад. Дар вилояти Суғд ҳарорати миёнаи моҳонаи ҳаво тибқи меъёри иқлимӣ мешавад. Ҳаво дар водиҳо 13+14 ва дар ноҳияҳои кӯҳӣ 5+7 дараҷа гарм мешавад. Дар даҳрӯзаҳои дуюм ва сеюми моҳ  пастшавии ҳарорати ҳаво дар ин минтақа  пешгӯӣ мегардад.