Вазирони корҳои хориҷии кишварҳои Осиёи Марказӣ ва Россия ҷаласаи сеюмро дар шакли видеоконфронс баргузор карданд

ДУШАНБЕ, 16.10.2020 /АМИТ «Ховар»/. 15 октябр Вазири корҳои хориҷии Ҷумҳурии Тоҷикистон Сироҷиддин Муҳриддин дар ҷаласаи сеюми вазирони корҳои хориҷии кишварҳои Осиёи Марказӣ ва Россия дар шакли видеоконфронс ширкат варзид.

Тавре ки АМИТ «Ховар» бо истинод ба Вазорати корҳои хориҷии Тоҷикистон иттилоъ медиҳад, дар ҷараёни ҷаласа сарони вазоратҳои корҳои хориҷӣ таҷрибаи вокуниш нисбат ба тавсеаи уфунати коронавирусро табодул карданд, кӯшишҳои эҳтимолии муштаракро ҷиҳати рафъи паёмадҳои манфии пандемия ва баланд бардоштани иқтидори зиддибуҳронии тарафҳо, аз ҷумла ҳамкорӣ дар соҳаи муҳоҷиратро баррасӣ намуданд.

Вазири корҳои хориҷии Тоҷикистон зимни суханронӣ дар мавриди иқдоми Ҳукумати кишвар дар самти мубориза бо тавсеаи сирояти коронавируси нав маълумот дод. Зикр шуд, ки бо супориши Сарвари давлат муҳтарам Эмомалӣ Раҳмон Ситоди ҷумҳуриявӣ оид ба пурзӯр намудани чорабиниҳои зиддиэпидемикӣ таъсис ёфта, кори Хадамоти санитарӣ — эпидемиологӣ фаъол гардонида шудааст. “Стратегияи пешгирии таъсири пандемия ба иқтисодиёт” таҳия ва қабул шудааст. Аз ҷумла, Фармони Президенти Ҷумҳурии Тоҷикистон «Дар бораи пешгирии таъсири сирояти COVID-19 ба соҳаҳои иҷтимоӣ ва иқтисодии Ҷумҳурии Тоҷикистон» тасвиб ва интишор ёфтааст, — иброз намуд вазир.

Вазирон ба масъалаҳои таъмини амнияти минтақавӣ таваҷҷуҳи хос зоҳир намуданд.

Дар ин замина С. Муҳриддин зарурати ноил шудан ба сулҳу субот дар Афғонистони ҳамсояро зикр карда, гуфт, ки Тоҷикистон ҳамчун ҳамраиси Раванди Истанбул оид ба Афғонистон барои мувофиқа намудани чораҳои вобаста ба расонидани кумаки амалӣ ба ин кишвар кӯшиши зарурӣ ба харҷ хоҳад дод.

Роҳбарони мақомоти корҳои хориҷӣ рушди ҳамкории тиҷоративу иқтисодӣ ва сармоягузорӣ, дурнамои татбиқи ташаббусҳои калидии кишварҳои Осиёи Марказӣ ва Федератсияи Россияро дар бахши транзитӣ — логистикӣ муфассал муҳокима карданд.

Бо таъкид бар афзалияти робитаҳои тиҷоратӣ ва иқтисодӣ бо кишварҳои Осиёи Марказӣ ва Россия С. Муҳриддин иброз дошт, ки сарфи назар аз буҳрон тамоюли мусбат дар тиҷорати мутақобилаи Тоҷикистон бо ин кишварҳо мушоҳида мешавад ва нишондиҳандаи умумии савдои тарафайн дар 8 моҳи соли 2020 тақрибан ба 1 миллиарду 480 миллион доллар расидааст.

Дар фарҷоми ҷаласа Изҳороти муштараки вазирон оид ба самтҳои стратегии ҳамкорӣ қабул шуд.

АКС аз ВКХ ҶТ