ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар Варзоб соҳибкорони маҳаллӣ беш аз 40 иншооти таъйиноти гуногун бунёд намуданд

ДУШАНБЕ, 17.11.2020.  /АМИТ «Ховар»/. Бахшида ба ҷашни 30-солагии Истиқлоли давлатии Ҷумҳурии Тоҷикистон  дар ноҳияи Варзоб бо ташаббуси соҳибкорони маҳаллӣ беш аз 40 иншооти таъйиноташон гуногун, аз қабили муассисаи таҳсилоти миёнаи умумии № 64 дар деҳоти Гулбоғ, толори варзиш, маркази забономӯзӣ, дорухонаҳо дар деҳаи Чорбоғ, хоҷагии мурғпарварӣ, хати оби ошомиданӣ, майдончаи варзиш, сехи дӯзандагӣ дар деҳоти Лучоб мавриди баҳрабардорӣ қарор гирифтанд. Дар ин бора хабарнигори АМИТ «Ховар» бо истинод ба мақомоти иҷроияи ҳокимияти давлатии ноҳия Варзоб хабар медиҳад.

Дар ноҳия аз ҳисоби буҷети маҳаллӣ ва дастгирии  соҳибкорон сохтмони 57 иншооти дигар идома дошта, баъди бунёд ва мавриди баҳрабардорӣ қарор гирифтани онҳо 108 нафар бо ҷои кори доимӣ ва мавсимӣ таъмин мегарданд. Инчунин дар боғи фарҳангии маркази ноҳия бунёди иншооти Парчами давлатии Ҷумҳурии Тоҷикистон оғоз ёфтааст.

Ёдовар мешавем, ки дар ноҳия 280 иншоот ба нақша гирифта шудааст. То имрӯз беш аз 140  адади он бунёд ёфтаанд, ки дар онҳо 354 нафар бо ҷойи кор таъмин гардиданд.