Дар шаҳри Турсунзода корҳои соҳилмустаҳкамкунӣ муташаккилона ҷараён доранд

ДУШАНБЕ, 12.10.2020 /АМИТ «Ховар»/. Шуруъ аз нимаи дуюми моҳи октябр вобаста ба мавсими пастшавии маҷрои об дар дарёҳои Қаратоғ ва Ширкент  корҳои дастаҷамъонаи соҳилмустаҳкамкунӣ дар деҳоти соҳилнишини шаҳри Турсунзода, босуръат ҷараён доранд.

Ҳамзамон дар якчанд деҳоти наздисоҳилии Ҷамоати деҳоти Қаратоғ, Работ, Ҷӯра Раҳмонов, Турсун Тӯйчиев ва 10-солагии Истиқлолият ҳашарҳои дастаҷамъона баргузор гардиданд. Дар натиҷаи корҳои анҷомёфта дамбаҳои харобгардида барқарор гардида,  дар соҳилҳои дарё ба масоҳати 2000 метр бетонҳои мукааб хобонида шуда, 2 пули мошингузар таъмир гардиданд.

Корҳои таъмирӣ ҷиҳати пешгирии шусташавии  соҳил дар селпартоҳои ҳудуди Ҷамоати деҳоти Регар дар масоҳати 1500 метр ба анҷом расонида шуданд. Аз ҳудуди шаҳри Турсунзода дарёҳои Қаратоғ ва Ширкент ҷорӣ гардида, деҳоти соҳилнишини он беш аз 20 деҳаро дар бар мегиранд. Аз ин лиҳоз масъалаи соҳилмустаҳкамкунӣ дар шаҳр аз масъалаҳои муҳим маҳсуб меёбад.

Ин аст, ки ҳамасола бо ташаббуси мақомоти иҷроияи ҳокимияти давлатӣ дар ҳамкорӣ бо шуъбаи ҳифзи муҳити зисти шаҳр, инчунин  бо иштироки аҳолӣ, корхонаҳои коркарди регу шағал, соҳибкорон ва моликони техникаҳои боркашу борбардор дар мавсими пастшавии маҷрои об корҳои дастаҷамъонаи соҳилмустаҳкамкунӣ гузаронида мешаванд.