Дастаи мунтахаби Тоҷикистон оид ба футбол ба мусобиқаи чемпионати Осиё омодагӣ мебинад

 ДУШАНБЕ, 17.11.2020. /АМИТ «Ховар»/. Дастаи мунтахаби ҷавонони то 19-солаи Тоҷикистон оид ба футбол ҷамъомади омӯзишиву машқии худро дар  шаҳри Душанбе шурӯъ кард. Омодагии даста ба марҳилаи ниҳоии мусобиқаи чемпионати Осиё нигаронида шудааст. Дар ин бора  шореҳи  варзиши АМИТ «Ховар» Меҳрони  Қурбон бо истинод ба Федератсияи футболи Тоҷикистон иттилоъ медиҳад.

Тамринҳои даста ду ҳафта идома мекунанд. Сармураббии дастаи  мунтахаби ҷавонони то 19-солаи Тоҷикистон  Мубин Эргашев барои иштирок дар ин мусобиқа 28 бозингар, аз ҷумла 4 нафар дарвозабон, 10 нафар муҳофизон, 8 нафар ниммуҳофизон ва 6 нафар ҳамлагаронро даъват кардааст.

Ёдрас мешавем, ки марҳилаи ниҳоии мусобиқаи чемпионати Осиё байни ҷавонон, ки аз 3 то 20 марти соли оянда дар Ҷумҳурии Ӯзбекистон баргузор хоҳад шуд, дастаи мунтахаби ҷавонони то 19-солаи Тоҷикистон дар гурӯҳи «Д» муқобили дастаҳои мунтахаби ҷавонони Малайзия, Яман ва Қатар бозӣ мекунад.

Чор дастаи беҳтарини ин мусобиқа соҳиби роҳхат ба мусобиқаи чемпионати ҷаҳон-2021 байни ҷавонони то 20-сола  мешаванд, ки дар  Индонезия баргузор хоҳад гашт.

Ҳайати дастаи мунтахаби ҷавонони то 19-солаи Тоҷикистон (U-19) дар ҷамъомади омӯзишиву машқӣ дар Душанбе:

Дарвозабонҳо: Муҳриддин Ҳасанов («Хуҷанд»), Шоҳрух Қирғизбоев, Самандар Каримов (ҳарду аз «Локомотив-Помир»), Муҳаммадрабӣ Раҳматуллоев («Барқчӣ»);

Муҳофизон: Алиҷон Кароматуллозода (КМВА), Манучеҳр Сафаров, Шоҳрух Сангов, Муҳаммад Саломзода, Исроил Холов, Маҳмуд Пиров, Ҷонибек Шарипов (ҳарду аз «Локомотив-Помир»), Сафиаллоҳи Назарзода («Хатлон»), Парвиз Бахтиёрзода («Регар-ТадАЗ»), Қиматшо Муминшоев («Панҷшер»);

Ниммуҳофизон: Абдулмумин Забиров («Хуҷанд»), Амадонӣ Камолов («Истиқлол»), Озодбек Панҷиев, Шӯҳрат Элмуродов (ҳарду аз «Локомотив-Помир»), Шерзод Дадабоев, Ҳикматилло Исмоилов, Умедҷон Холиқов, Муҳаммад Бӯризод (ҳама аз «Барқчӣ»);

Ҳамлагарон: Рустам Соиров («Истиқлол»), Ислом Зоиров, Азизбек Ҳасанов, Парвиз Хоҷиев (ҳарсе аз «Локомотив-Помир»), Салам Ашӯрмамадов («Истаравшан»), Сунатулло Исмоилов («Хатлон»).

Сармураббӣ – Мубин Эргашев.