Теъдоди қурбониёни заминларзаи Туркия то 64 нафар афзуд

ДУШАНБЕ, 02.11.2020 /АМИТ «Ховар»/. Теъдоди қурбониёни заминларза дар Туркия то 64 нафар афзуд. Тавре АМИТ «Ховар» хабар медиҳад, дар ин бора рӯзи якшанбеи 1 ноябр Департаменти ҳолатҳои фавқулодаи Туркия иттилоъ додааст.

«64 нафар ҷон бохтаанд. Дар Измир айни замон корҳои ҷустуҷӯйӣ ва наҷотдиҳӣ дар 8 бино идома доранд», — омадааст дар изҳорот.

Тибқи маълумоти охирин, 940 нафар осеб дидаанд, ки  аз  ин теъдод 218 нафар дар беморхонаҳо бистарӣ шуда, 722 нафар пас аз дарёфти табобат рухсат шудаанд, менависад «Газета.ру».

Заминларза бо шиддати 6,6 бал рӯзи ҷумъа, 30 октябр, дар наздикии шаҳри Сеферихисари вилояти Измир рух дода буд.

Маркази зилзила дар баҳри Эгей дар умқи 16,54 км воқеъ будааст. Пас аз зилзила 658 пасларза ба амал омадааст, ки шиддати 40-тои онҳо бештар аз 4 балл будааст.

Рӯзи дигар Президенти Ҷумҳурӣ Раҷаб Тайип Эрдуғон ба вилояти аз офати табиӣ осебдида омадааст.

                                                                 АКСИ: REUTERS/Kemal Aslan