Варзишгарону ҷавонон ташаббуси Раиси шаҳри Душанберо дастгирӣ намуданд

ДУШАНБЕ, 21.11.2020 /АМИТ «Ховар»/. Дар Лучоба бо иштироки зиёда аз 300 нафар таҳти шиори «Ин Ватанро мо ҷавонон сабзу хуррам мекунем» маъракаи ниҳолшинонӣ баргузор гардид, хабар медиҳад АМИТ “Ховар” бо истинод ба маркази матбуоти Кумитаи кор бо ҷавонон ва варзиши назди Ҳукумати Ҷумҳурии Тоҷикистон.

Ба иттилои манбаъ, роҳбарият ва кормандони Кумитаи кор бо ҷавонон ва варзиш, ташкилотҳои система ва муассисаҳои таълимии варзишии пойтахт, аз ҷумла Донишкадаи тарбияи ҷисмонии Тоҷикистон, Коллеҷи тарбияи ҷисмонии Тоҷикистон ва Раёсати кор бо ҷавонон ва варзиши шаҳри Душанбе ташаббуси Раиси шаҳри Душанбе муҳтарам Рустами Эмомалиро вобаста ба табдил додани пойтахти мамлакат — шаҳри Душанбе ба шаҳри сабз дастгирӣ намуда, ин маъракаи ниҳолшинониро ташкил намуданд.

Дар ҷараёни ҳашари дастаҷамъона зиёда аз 400 адад ниҳолҳои ороишию мевадиҳанда шинонида шуда, гирду атрофи Оромгоҳи “Лучоб” тозаву озода гардонида шуд.

Кумита ва сохторҳои он дар кишвар, ҳар рўзи шанбе ин ташаббусро дар дигар минтақаҳои кишвар низ идома дода, баҳри таҷлили сазовори ҷашни 30-солагии Истиқлолияти давлатии Ҷумҳурии Тоҷикистон саҳми муносиби хешро дар ободониву созандагии Тоҷикистон мегузоранд.