Ҳашт қатли ҳадафмандона дар даҳ рӯзи охир дар Кобул

ДУШАНБЕ, 11.12.2020 /АМИТ «Ховар»/. Ҳамидуллоҳ ал-Бухорӣ — олими дин, раҳбари бахши кори мазҳабӣ ва фарҳангии дивизияи 111, яке аз охирин қурбониёни кушторҳои ҳадафнок дар минтақаи Пули Чархии Кобул мебошад, хабар медиҳад АМИТ «Ховар» бо истинод ба сомонаи шабакаи телевизионии Афғонистон tolonews.com.

Дар идомаи қатлҳои мақсаднок дар Кобул, Ҳамидуллоҳ ал-Бухорӣ — олими дин, раҳбари бахши кори динӣ ва фарҳангии дивизияи 111 дар наздикии қисми низомии мазкур кушта шуд.

Дар ҳамин ҳол, шахсони мусаллаҳи ношинос дар ноҳияи Панҷуми Кобул як полковники мустаъфиро низ қатл намуданд.

Мутобиқи омор, дар даҳ рӯзи охир дар Кобул аз ҷониби афроди мусаллаҳи номаълум ҳашт нафар кушта шуданд.

Тибқи маълумоти Вазорати корҳои дохилӣ, дар як моҳи охир 22 нафар хизматчии низомӣ дар манотиқи гуногуни кишвар кушта шуданд.

Ҳамидуллоҳ ал-Бухорӣ яке аз охирин қурбониёни кушторҳои ҳадафнок дар минтақаи Пули Чархии Кобул мебошад.

«Вазъият бад аст, дар ин ҷо ҳама мардуми бенаво зиндагӣ мекунанд, ҳама шаҳид мешаванд», — гуфт вакили маҳалла Раҳматуллоҳ Ҳамза.

Тӯфан Туркӣ, як афсари мустаъфӣ дар ноҳияи 5 ва Ҳанифуллоҳ Хоксор, муҳофизи сардори пешини полиси вилояти Бодғис — ду нафари дигаранд, ки дирӯз дар ҳамлаи афроди мусаллаҳ кушта шуданд.

«Ҳеҷ амният нест. Агар ба хона меравем, бояд чор ё панҷ нафар ҳамроҳамон бошанд», — гуфт Аҳмад Соҳил Нурӣ, як сокини пойтахт.

«Амният рӯз ба рӯз бадтар мешавад, мардум дар назди идораи полис кушта мешаванд», — гуфт Муҳаммад Оғо, як сокини дигари пойтахт.

Тақрибан ду моҳ аст, ки муовини аввали президент масъулияти таъмини пойтахтро ба даст гирифтааст. Аммо шаҳрвандон мегӯянд, ки рӯйдодҳои ҳаросафканӣ ҳамоно мардумро нигарон кардааст.