Фаъолияти муваффақонаи «Равзанаи ягона»: Беш аз 1100 нафар истифодабарандагон ба қайд гирифта шудаанд

ДУШАНБЕ, 15.12.2020 /АМИТ «Ховар»/. Ба ҳолати 1 декабри соли равон  дар низоми “Равзанаи ягона” беш аз 1100 нафар истифодабарандагон ба қайд гирифта шуда, аз тарафи онҳо ба мақомоти ба низом шомилшуда 7500 адад дархостҳои шаклашон ягона ирсол гардидаанд. Дар натиҷаи баррасӣ 4664 ҳуҷҷати иҷозатдиҳӣ ва сертификатҳо ба субъектҳои хоҷагидор тариқи электронӣ пешниҳод шудаанд.

Бо назардошти баъзе мушкилоти ҷойдошта низоми Равзанаи ягонаи барасмиятдарории амалиёти содиротию воридотӣ ва транзитӣ дар Ҷумҳурии Тоҷикистон, ки моҳи сентябри имсол ба таври расмӣ  ҷорӣ гардида буд, муваффақона фаъолият менамояд.

Ин нукта дар ҷаласаи Шӯрои ҷамъиятию машваратӣ доир ба фаъолияти гумрукӣ дар назди Хадамоти гумрук баён гардид.

Аз Хадамоти  гумруки  назди Ҳукумати ҷумҳурӣ ба АМИТ «Ховар» иттилоъ доданд, ки мавриди истифода қарор гирифтани низоми «Равзанаи ягона»- гузариш аз шакли коғазӣ ба электронии мубодилаи ҳуҷҷатҳои расмӣ қадами навбатӣ барои тақвияти татбиқи ҳукумати электронӣ, сода ва шаффоф намудани расмиёти марбут ба танзими савдои хориҷӣ ва хизматрасонии давлатӣ маҳсуб шуда, ба зиёд шудани гардиши тиҷорати хориҷӣ ва беҳсозии фазои соҳибкорӣ дар мамлакат мусоидат мекунад.